Turhalli: Rayêk zî zaf qiymetin a, ma ganî wayîr bivejîyê

Endama parlamenterîye ya Partîya Çep a Keske ya Çewlîgî Cemîle Turhalli Balsake va, “Rayêk zî zaf muhîm a û ma ganî wayîrê sindoqan bivejîyê.”

Weçînayîşî rê çend rojî mendê. Vatêyanê Soylûyî ra dima derheqê ewleyîya weçînayîşî de qisawetî zêdîyenê. Hetê Partîya Çep a Keske ra ciwanan rê gazîye yenê kerdene ke wa rayanê xo bidê û wayîrê sindoqan bivejîyê. 

Endama parlamenterîye ya Partîya Çep a Keske ya Çewlîgî Cemîle Turhalli Balsake, seba şarî bi Kirmanckî û Tirkî gazîye kerde. Aye qiseykerdişê xo de va, “Şima ganî mohrê xo bidê binê dara Partîya Çep a Keske ro. Badê raydayîşî ganî şima pusula weş qat bikerê ke meçarîya cayanê bînan. Wa raya şima hetê teberî de bo. Ci ra bawer bibê ke murekebê mohrî ziwa bo. Dima pusulayan dekerê zereyê zarfî û bierzê sindoqan.”

‘Ma ganî sindoqan terk mekerê’

Turhalli dewamê qiseyanê xo de va, “Qasê raydayîşî, pawitişê rayan zî zaf muhîm o. Weçînitoxî eşkenê cayê raydayîşê xo de bimanê. Keremê xo ra sindoqanê xo terk mekerê. Şima eşkenê badê hûnartişê pusulayan heta YSK zî şorê.”

Turhalli dîyar kerd ke rayêk zî seba erşawitişê îqtîdarî zaf muhîm a.

MA / ÇEWLÎG