Vera tecrîdî parlamenterê HDPyî şîyê vernîyê Wezaretîya Edaletî

• Parlamentera HDPyî Meral Daniş Beştaşe va, “Tirkîya de îşkence û tecrîd esto û sûcê merdimîye yeno kerdene.”

Parlamenterê HDPyî vera binpaykerdişanê hepisxaneyan û tecrîdî serektîya Meral Daniş Beştaşe û Sarûhan Oluçî eywana kombîyayîşî yê çapemenîye de ameyê pêser. Parllamenterî ver bi Berê Dîkmenî yê meclîse şîyê. Hemserekê DTKyî Berdan Ozturk zî beşdarê rayîrşîyayîşî bi. Verê Berê Dîkmenî de polîsan vernîyê parlamenteran girewt la muzakereyan ra dima rayîrşîyayîş dewam kerd. Bi dovîzanê destan rayîrşîyayîşê parlamenteran dewam kerd. Seba ke Wezîrê Edaletî de pêvînayîşêk bibo, parlamenterî şîyê Wezaretîya Edaletî û dima no derdeq de malûmatê çapemenîye ame kerdene.

‘Ma do demêkî nêzdî de wezîrî de pêvînayîşêk bikerê’

Meral Daniş Beştaşe va, “Ma wezaretîye de kewtê têkilîye. Ma do dêmêkî nêzdî de wezîrî de pêvînayîşêk bikerê. Wezîrê Edaletî ewro tîya nîyo. Binpaykerdişê hepisxaneyan, îşkenceyî, surgunî û tecrîd rasayê astêka berze.

Îmrali ra xebere nêgerîyena

Meral Daniş Beştaşe va, “Ma her roje xeberanê binpaykerdişan û xeberanê mergî danê. Ma seba çareserkerdişanê nînan kede danê. Heto bîn ra tecrîdê Îmraliyî bi giranî dewam keno. 25ê Adare 2021î ra nat Birêz Abdullah Ocalanî û hepsîyanê bînan ra xebere nêgêrîyena. Qet yew cayê dinya de sîstemêko winasî çin o. Ma zanê ke nê pêroyî polîtîkayanê şerî ver yenê kerdene û ma zî sey HDP xoverdayîşê haştîye danê.” 

Hepisxaneyî bîyê mergxane

Beştaşe va, “Hepisxaneyan ra 9 aşmî de 62 cinazayî vejîyayê. Hepisxaneyî bîyê mergxane. Tevavuzkarî, qatîlî û mafyayî bi qanûnê înfazî ameyê veradayîş. Dayîkê wayîrê gerguşî, nêweşî û kokimî sebebanê sîyasîyan ver hepis de manenê. Ma qîrayîşê nê vengî yê. Ma do Wezîrê Edaletî de pêv3inayîşêk bikerê. Hinî sebrê komelî nêmendo. Ganî tecrîd cade bêro wedartiş, înfazî meyerê vêşnayîş û hepsîyê nêweşî bêrê veradayîş. HDP do na mesele de gamêk têpîya meerzo. Xoverdayîşê ma do dewam bikero.”

MA / ENQERA