Yewîtîya Cinîyan ê Ermenîyan ê Bakur û Rojhelatê Sûrîyeyî ameye îlankerdiş

Kongreya verêne ya Meclîsa Cinîyanê Ermenîyan de ronayîşê Yewîtîya Cinîyan ê Ermenîyan ê Bakur û Rojhelatê Sûrîyeyî ame îlankerdiş.

Hesekêyî de kongreya verêne ya Meclîsa Cinîyan ê Ermenîyan ameye viraştene. Endamê 150 dezgeyanê cinîyan beşdarê kongre bîyê.

Konferansî de xeylê qiseykerdişî ameyê kerdene. Netîceya konferansî de ronayîşê Yewîtîya Cinîyan ê Ermenîyan ê Bakur û Rojhelatê Sûrîyeyî ame îlankerdiş. Malûmatê netîceye de ame vatiş ke, “Kede û xebatan ra dima cinîyê Ermenîyî ameyê têhet û 30ê Tebaxe de konferansê Yewîtîya Cinîyan ê Ermenîyan ame viraştene. Bi nê konferansî ma da xo ver ke, Ermenî û şarê bînî ke hetê Osmanîyan ra raştê qirkerdişan ameyê wa wirzê payan ser û yewîtîya xo awan bikerê. Ganî komelêka azade bêra awankerdiş ke, Bakur û Rojhelatê Sûrîyeyî de şarî mîyanê yewîtîye de bicuwîyê. Cinîyê Ermenîyî zî ganî mîyanê na yewîtîye de fikrê îqtîdarî ra ca bigerê.”

Malûmatê neticeye de Neteweyanê Yewbîyayîyan rê, komela mîyannetewîye û rêxistinanê hiqûqî rê gazîyêk ameye kerdene û ame vatiş ke, ganî Terteleyê Ermenîyan sey sûcê şerî bêro qebulkerdiş û sûcdarî bêrê cezakerdiş.

Kongre de hêrîşê Tirkîya ameyê şermezarkerdiş. Înan va, ganî şarê mintiqa vera çeteyanê Neo Osmanîyan bibo yew. Reyna ame dîyarkerdiş ke, seba ke hêrîşî vinderê ganî sehaya hewayî bêra padayîş.

Peynîya konferansî de, Anahîd Qesebyane serektîya Yewîtîya Cinîyan ê Ermenîyan ê Bakur û Rojhelatê Sûrîyeyî rê ameye weçînayîş. Reyna hetkarê yewîtîye û serekê Hesekê, Qamişlo, Reqa û Deyrezorî bi weçînitişî ameyê dîyarkerdiş.

ANHA / HESEKÊ