Ma ney heqîqet erzîya peyê beran

• Rojnamegerî Dîcle Muftuoglû û Sedat Yilmazî mesajêk erşawit û înan dîyar kerd ke ê ney heqîqet erzîyayo peyê beran.

Hemserekê DFGyî Dîcle Muftuoglû û edîtorê MAyî Sedat Yilmaz, 3ê Gulane Roja Azadîya Çapemenîye de rojnamegerîye ver ameyê girewtene.

Rojnamegeran Hepisxaneyê Sîncanî ra mesajêk erşawit û înan dîyar kerd ke 14ê Gulane de do no îqtîdar binbikewo.

‘Îqtîdar do şoro û roj do vejîyo’

Hemserekê DFGyî Dîcle Muftuoglû va, “Nuştuşê heqîqetî sey sûcî yeno dîyayene. No îqtîdaro do binbikewo. Îqtîdar 10 aşmî ra nat bi operasyonan wazeno textê xo qeyîm bikero la do vîndî bikero. Ma do peye beran ra zî heqîqet birasnê şarî. Ma zanê ke wazenê ma ney heqîqetî bierzê peyê beran. Ganî pêro hemkarê ma vera înan vengê xo berz bikerê. Ma veng a rêxistinana sivîlan danê ke wa wayîrê heqê xeberegirewiştişî bivejîyê. No tarîyo zulmat nîşanê vejîyayîşê rojî yo. Çapemenîya azade do serbikewa. Ez selam û heskerdişanê xo erşawena.”

‘Êyê ke operasyonê weçînayîşî kenê do bi weçînayîşî şorê’

Edîtorê MAyî Sedat Yilmazî va, “Seba paştîdayîşanê sazîyan ma zaf sipas kenê. Ez 23 serrî yo karê rojnamegerîye kena û karê rojnamegerîye sey sûcî ameyê ramojnayene. Înan waşto karê rojnamegerîye îllegalîze ramojnê. No operasyonê weçînayîşî bi. Mi bi qerardarî paştî dabi embazanê xo yê girewteyan. Êyê ke operasyonê weçînayîşî kenê do bi weçînayîşî şorê. Ez her kesî rê selam û heskerdişanê xo erşawena.”

MERKEZÊ XEBERAN