DFG: Ê generalê qijkek ê Apê Mûsayî bî

Vilakerdoxê rojnameyî Halîl Adanir, 31 serrî verî cû Êlih de ame qetilkerdiş. DFGyî dîyar kerd ke ê generalê Apê Mûsayî bî û înan kedêka pîle daye.

Komeleya Rojnamegeran a Dîcle Firatî (DFG), vîlakerdoxê rojnameyî Halîl Adanir o ke 21ê Teşrîna Peyêne de Êlih de ame qetilkerdiş yad kerd. Eşkerayîye de ame vatene ke, “Êlih de texsî ser de xebitîyayêne. Hetê her kesî ra ameyêne heskerdiş. Rojnameyê Ozgur Gundemî hîna aşma Gulane de dest bi weşanê kerdibi. Cayê ke tede rojname estibi ameyêne tehtîdkerdiş û ameyêne veşnayîş. Adanirî berpisîyarî girewtibî xo ser û bi texsîya xo rojname kerdêne vila. Hema ke ser ra aşmêk nêvîyartibi ke 21ê Teşrîna Peyêne 1992 saete 14.00 de 3 tenî sey muşterî nişte texsîya ey. Înan nêzdîyê hepse verênî de o xemîna, benzin verda wesayît û tewrê Halîl Adanirî ya da adirî ver.”

‘Înan barêko giran wedarna’

Eşkerarîya DFGyî de ame vatene ke, “Wexto ke ma qala rojnamegerîya birûmete kenê, sere de ma ganî nê şehîdanê çapemenîye yad bikerê. Zaf rey yenê îxmalkerdiş la rolê vilakerdoxanê rojnameyan zaf muhîm o. Înan heqîqet rasnayo komel û barêko giran girewto xo ser. 90an de rojnamegerî kuçeyan de ameyêne qetilkerdene, buroyê rojnameyan ameyêne veşnayene û kuçeyan de Jîtem, kontr-gerîllayî û Hîzbî-kontrayî gêrayêne. Vilakerdoxan bi fedekarîye barêko giran wedarna û ewro wexto ke ma înan yad kenê, ma nêşkenê fedakarîya înan biyarê ziwan. Aşma Teşrîna Peyêne aşma vilakerdoxanê rojnameyî ya. Na aşme de 5 embazê ma yê vilakerdoxî ameyê qetilkerdiş. Înan yew zî Halîl Adanir o ke 21ê Teşrîna Peyêne 1992yî de Êlih de ame qetilkerdiş.

Faîlî dîyar ê

Halîl Adanirî ra dima vera vilakerdoxan hêrişî nêvindertê. 9ê Teşrîna Peyêne 1993yî de Adîl Başkan, 19ê Teşrîna Peyêne 1993yî de Kadîr Îpeksurer, 27ê Teşrîna Peyêne 1993yî de Adnan Işik û 27ê Teşrîna Peyêne 1998î de Nîhat Yakût ameyê qetilkerdiş. Aşma Teşrîna Pey3ene ra teber bi dore Kemal Ekîncî, Loqman Gunduz, Orhan Karaagar, Tegmen Demîr, Haşîm Yaşa, Yusuf Karauzum, Zulkuf Akkaya, Yalçin Yaşa, Mehmet Sencer, Mûsa Duru, Zuhal Tepe, Hidir Çelîk, Hasan Aydin, Metîn Alataş û tewr peyên zî Kadîr Bagdu, esasê xo de bi faîlanê dîyaran ke hetê dewlete ra ameyê pawitene ameyê qetilkerdiş.

Ma înan bi hurmet yad kenê

Serranê 90an de tradîsyonê çapemenîya azade awan bi û Halîl Adanirî ra heta Kadîr Bagduyî 18 embazê ma yê vilakerdoxî qehremanê hîkayeyêk ê. Ê generalê qijkek ê Apê Mûsayî bî. Seba ke çapemenîya azade birasa nêrojan, înan kedêka pîle daye. Înan tena kede zî nêda, înan canê xo zî da. Ma pêroyan bi hurmet yad kenê û ma do rêça xatirayanê înan terk mekerê.”

MA / AMED