212 sazî û şexsîyetan seba Suleyman Ehmedî gazîye kerde

Rojnameger Suleyman Ehmed o ke amebi ramnayene ra 41 rojî yo xebere çin a. Mintiqaya Kurdistanî ra hetê 212 sazî û şexsîyetan ra gazîye ameye kerdene ke bêro veradayene.

Edîtorê Servîsê Erebkî yê Rojnewsî Suleyman Ehmed, 25êê Teşrîna Verêne de Berê Pêşxabûrî de hetê hêzanê PDKyî ra ame remnayene. Suleyman Ehmedî ra 41 rojî yo xebere nîna girewtene.

Seba ke Suleyman Ehmed bêro veradayene Mintiqaya Kurdistanî ya Federeyî de hetê 212 sazî û şexsîyetan eşkerayîye şerîke ameye kerdene. Mîyanê gazîkerdoxan de rojnamegerî, sîyasetmedarî, aktîvîstî û pawitoxê heqan est ê.

Eşkerayîye de nê çîyî ameyê vatene:

“Raya pêroyîye rê;

Rojnameger Suleyman Ehmed hetê Asayîşê Dihokî ra aşmêk ra zêde yo gêrîyayo binê çimî û ci ra xebere nîna girewtene.

Seba ke bêro veradayene kampanyayî ameyê kerdene û hetê awiqatan ra 10î ra zêderî muracatî bîyê la netîceyêk nêameya girewtene. Asayîşê Dihokî nêverdayo awiqatî Ehmedî bivînê.  

Ma sey rojnameger, hiqûqnas, aktîvîst û azadîwaştoxan vanê ke senoryaya ke rojnameger Şêrwan Şêrwanî rê amebî hedrekerdiş tekrar bena. Wazenê Ehmedî bi neheqî sûcdar ramojnê.

Ganî her kes vera nê kerdenan vengê xo berz bikero. Çîyê ke qewimîyenê do ameyoxê Mintiqaya Kurdistanî bifînê prosesêkî xirabî.

Suleyman Ehmed bêsûc o. Seba ke rojnameger o gêrîyayo binê çimî û ameyo remnayene. Ewleyîya canî ya Suleyman Ehmedî ra Asayîşê Dihokî û Hukmatê Mintiqaya Kurdistanî berpirsîyar ê. Suleyman Ehmed ganî cade bêro veradayene.”

YENÎ YAŞAM