MKGP û DFG: Dozger seba dergbîyayîşê girewtişî mehneyan ra gêreno

• Hetê MKGP û DFGyî ra vernîya Edlîyeya Dîyarbekirî de derheqê 16 rojnamegeranê girewtîyan de malûmat ame dayene.

MKG û DFGyî, derheqê rewşa 16 rojnamegeran de vernîya Edlîyeya Dîyarbekirî de malûmat da. Keyeyê rojnamegeran, Parlamentera HDPyî Remzîye Tosûne, Hemserekê HDPyî yê Dîyabekirî Gulistan Atasoy û Zeyyat Ceylan bîyê beşdarê malûmatî.

‘8 aşman de şima se kerd?’

Sekreterê DFGyî Cuma Daşî va, “Mudeyê girewtişî yê rojnamegeran bi sey îşkenceyî. Dozgerê dosya ganî na neheqîye orte ra wedaro la nika zî wazeno înan pîne bikero. Dozger vano ‘Dokumanê dîjîtalî zêde yê’. Ma ey ra pers kenê; Hende wext girewtişê rojnamegeran zêde nîyo?’ Dozger nêeşkayo dokumananê bernameyan ra ‘eendamtîya rêxistinî’ vejo û nika zî kewto dokumananê bînan dima. Dozger vato erdlerze ver dokumanî nêrasayê destê mi. La şima erdlerze ra ver ê 8 aşman de se kerd û şima çira hedre nêkerd?”

Dosya hetê polîsî ra ameye hedrekerdiş

Daşî dîyar kerd ke, dosya hetê dozgerî ra ney hetê polîsî ra ameye hedrekerdiş û va, “Dozger mudaxeleyê ney nêkeno û gêreno mehneyan. Şima çir ana dosya sey dosyaya yew kesî vînenê? Ma vajê dokumanî zêde yê, rojnamegeran veradê û îdîanameyî dima hedre bikerê.”

Qelema heqîqetî, bi dewayan çewt nêbena

Dewamê malûmatî de Daşî va, “9 aşmî zere de tepiştiş bîyo sey cezadayîşî. Ma zanê ke no îqtîdarê puyayî ra teber nîyo. Ma veng a hakim û dozgeran danê; no îqtîdar ewro esto, meşte çin o. Bi talîmatanê îqtîdarî têmegêrê. Na xeletîye terk bikerê û fek neheqîye ra veradê. 16 embazanê ma cade veradê û îdîanameyî hedre bikerê. Qelema heqîqetî bi astengîyan, girewtişan û bi dewayan çewt nêbena.”

Malûmat, bi slogananê ‘Vengê çapemenîya azade nîno birnayene’ qedîya.

MA / DÎYARBEKIR