'Rayraşîyayîşê Demokrasîyî' resa Anqara

• 'Rayraşîyayîşê Demokrasîyî yê vera Darbe' yo ke HDPyî 15ê hezîrane de Colemêrg û Edîrne de dabi destpêkerdene resa Anqara. Hemserekanê Pêroyînan ê HDPyî eşkerayîyêka hempare daye.

Rayraşîyayîşê Demokrasîyî yê vera Darbeyo HDPyî 15ê hezîrane de Colemêrg û Edîrne de dabi destpêkerdene resa Anqara. Seba çalakîya peyêne ya rayraşîyayîşî bi desan rêxistinê demokratîkî Parka Meclîsî de ameyî têhet. HDPyîjî, parçeyê HDPyî, Hemvervatoxê HDKyî Sedat Şenoglu, Federasyonê Meclîsan ê Sosyalîstan, temsîlkarê Partîzanî, Hemsereko Pêroyî yê ÎHDyî Ozturk Turkdogan, Serekê Konseya Merkezî ya TTByî Sînan Adiyaman, Serekê Şorişgêranê 78î û şaîr Ahmet Tellî, hemserekê KESKî Mehmet Bozgeyîk, serekê Komeleya Kulturî ya Pîr Sultan Abdalî Ganî Kaplan û xeylêk rêxistinê demokratîkî tewrê çalakîye bîyî.

Endama Heyetê Rayberdişî yê Merkezî yê HDPyî Îlknure Bîngol vat: ''Ma Edîrne ra heta Colemêrgî rayraşîyayîşê xo yê demokrasîyî da destpêkerdene. Ma nika reyna anê ziwan ke ma do waranê sîyasetê demokratîkî de tim têkoşîn bikerê.''

Çalakîye de Leyla Guven, Musa Farisogullari û Enîs Berberlîogluyî rê ke dest nîya wekîlîyanê înan ser, mesaj ame erşawitene.

Girseyî verê parke de pê coşêkê pîlî Hemserekê HDPyî Pervîne Buldan û Mîthat Sancar pêşwazî kerdî. Hemserekanê Pêroyînan çimdarî û waştişê xo bi nameyê ''Netîcenameyê Rayraşîyayîşê Demokrasîyî yê HDPyî'' eşkera kerdî.

Netîcename de ame vatene ke 1ê hezîrane ra heta 1ê êlule pê nameyê Bernameyê Têkoşînê Demokratîkî bernameyêk ame amadekerdene û armanco verên ê nê bernameyî vera hîşmendîya derbekere pawitişê demokrasî, heq, huqûq, edalet û azadî yo.Netîcename de nê çîyî ameyî vatene: ''Ma pê nê rayraşîyayîşî waşt ke ma îqtîdarî rê hînî vajê bes û ma îtîrazê komelî biresnê kuçeyan. Ma şaranê Tirkîya rê eleqeyêko pîl dî. No eleqe mojna ke berzkerdişê têkoşînî çend girîng o.

Armancê Rayraşîyîşî

Ma seba waştişê kar û nanî yê bi mîlyonan kesan, seba waştişê haştîye, seba çareserîya demokratîke ya meseleya kurdan, seba cinîyan, ciwanan, seba kedkaran, seba xizanan, seba karkeran rayîrî ra şîyî.

Ma têna nêşîyî. Rixmê astengîyan zî temamîya komelî paştî da ma, ma pê hêz û qewetê înan rayîrî ra şîyî. Partîya ma reyna mojna ke a parçeyêko girîng ê Tirkîya, pawitoxa demokrasî, heq û azadî ya. 

Ma pê mesuldarîyêka pîle ya demokrasîyî rayîrî ra şîyî û rayraşîyayîşê xo temam kerd. Bi nê hawayî qerardarîya şarê ma, îrade û hêvîya şarê ma bîyî pîlêr.''

Qiseykerdişê hemserekan ra dima beşdaran payan ser o çepikî dayî piro. Bi nê hawayî safhaya yewine ya bernameyê HDPyî yo ke do heta 1ê êlule dewam bikero, qedîyaye.

ANF