Şarê Amedî paştî daye Mizrakliyî: Ma do sindoqe de cewab bidê

Şarê Amedî derheqê cezaya ke dîyaya Selçuk Mizrakiyî de va, “Çira ameyo girewtene ma zî zanê dinya zî zana.”

Selçuk Mizrakli, weçînayîşê herêmî yê 31ê Adare 2019î de raya se ra 62yî yê şarê Amedî girewt û bi Hemserekê Beledîyeya Amedî. 3 aşmî weçînayîşî ra dima qeyûm erzîya beledîye ser û Selçuk Mizrakli ame girewtene. Mehkemaya dewaya ci newe ra ameye kerdene û reyna cezaya 9 serrî û 4 aşmî û 15 rojî dîyaye ci.

Selçuk Mizrakiyî qerarî ra dima va, “Ne ez sereyê xo çewt kena ne zî ez sereyê şarê xo û embazanê xo kena çewt.” 

Şarê Amedî paştî daye Selçuk Mizrakliyî û înan dîyar kerd ke do cewabê xo weçînîtişî de bidê.

‘Seba ke Kurd o ceza dîyaya ci’

Welatîyan ra Mehmet Yayikî dîyar kerd ke bi mehneyê ‘rêxistinî finanse keno’ qeyûmî tayîn bîyê û va, “Eke merdim biewno raporanê Sayiştayî ra rewşe tam eqsê ci ya. Raporan ra dîyar beno ke hetê qeyûman ra beledîyeyî senî ameyê talankerdene. Bi mîlyon kesî raye danê û vanê nê îradeyê ma yê û ti bi qerarnameyêk qeyûman erzenê beledîyeyan ser. Na neheqî ya. Çîyê ke îdîa benê pêroyî hîkaye yê. Seba ke Kurd ê ameyê cezakerdiş. Eynî wext de wazenê şarê Kurdî ceza bikerê. Şarê ma do timûtim wayîrê îradeyê xo bivejîyo.”

Ma na ceza qebûl nêkenê!

Welatîyan ra Bakî Camî va, “Eke edalet bibîyêne, nêşkayêne qeyûman tayîn bikerê. Her çî goreyê vateyanê Erdoganî beno. Selçuk Mizrakliyî dizdî nêkerda, fikranê xo ver na ceza dîyaya ci. Mizrakliyî mehkema de sere nêna ro. Rastîya ma zî na ya û ma sere nênanê ro. Ma do reyna hemserekanê xo biweçînê. Wa reyna qeyûm bierzê. Înan xo dinya de rezîl kerdo. Mizrakliyî bi xoverdayîşî wayîrê îradeyê şarê xo vejîyayo. Dizdîya qeyûman eşkera ya. Beledîyeya Rêzanî de dizdîya înan eşkera bîye. Çira ceza nêdanê ci? Ê zî şerîkê ci yê. Na ceza sîyasî ya û ma nê qerarî şermezar kenê.”

MA / AMED