Hêrişa ke vera tabeleya HDPyî ameybî kerdene ameyê protestokerdiş

Idîr de tabeleya HDPyî rê hêrişe ameybî kerdene. Na hêrişe bi rayraşîyayîşî ameye protestokerdiş.

Vizêrî Idirî de tabeleya HDPyî ameybî cirakerdiş û erzîyaybî çop. Hetê HDP, PÇK, DBP û TJAyî ra na hêrişe bi rayraşîyayîşî ameye protestokerdiş. Parlamenterê Idirî Yilmaz Hûn û xeyle kesî bîyê beşdarê pprotestoyî.

‘Provakasyonî do bênetîce bimanê’

Girse, vernîya awanîya HDPyî de ame pêser û tîya de malumatêk ame dayene. Hemserekê DBPyî yê Idirî Mehmet Sekmenî va, “Zîhnîyetê AKP-MHPyî komelî provake keno. Vera nê hêrîşanê faşîzanan ma do xoverdayîşê xo ra fek rameverdê. Serran ra nat vera heteketê sîyasî yê Kurdan nê hêrişî benê û hêrişî do bênetîce bimanê.”

Hiqûq yeno binpaykerdiş

Sekemnî dîyar kerd ke hiqûq yeno binpaykerdiş û va, “Hinî çiyêk nêmendo ke no îqtîdar bido nê komelî. Netîceyê polîtîkayanê îqtîdarî de tena nefret û hêrs dîyeno destê komelî. Weçînayîşê beledîyeyan nêzdî benê û na hêrişe ramojnena ke do hetê îqtîdarî ra provakasyonî dewam bikerê. Nê zîhnîyetî ver Kurdî tarîx de xeylê reyan raştê qetlîaman ameyê. Ma do vera nê zîhnîyetî qetîyen sere menê ro.”

Malumatî ra dima, hetê şarî ra tabeleya partî reyna ameye daliqnayene.

MA / IDÎR