3 bajaranê pîlan de DEM Partîye rê 590 muracatî bîyê

Amed, Mêrdîn û Wanî de seba hemserekîya beledîyeyan DEM Partîye rê 590 muracatî bîyê.

Partîya Têduştî û Demokrasî ya Şaran (DEM Partî) de muracatê namzetîye 25ê Kanûne de qedîyayê. Partî do aşma Çeleyî mîyan de verweçînitiş bikero û namzetanê xo dîyar bikera. Amed, Wan û Mêrdînî de seba hemserekîya beledîyeyan 590 kesan muracat kerd.

Amed: 243 muracatî

Weçînayîşê beledîyeyan ê 2019î de Amed de HDPyî 19 beledîyeyan ra 15 beledîyeyî qezenc kerdibî. Dima qeyûmî erzîyayê 14 beledîyeyan ser û destê HDPyî de tena Beledîyeya Çinarî mende. Seba weçînayîşê 31ê Adare 2024î, Amed de DEM Partîye rê 243 muracatî bîyê. 

Wan: 44 cinîyan muracat kerd

Weçînayîşê 2019î de Wan de HDPyî 14 beledîyeyan ra 10 beledîyeyî qezenc kerdibî. Dima qeyûmî erzîyayê nê pêro beledîyeyanê HDPyî ser. Seba weçînayîşê 2024î Wan de DEM Partîye rê 208 muracatî ameyê kerdene. Nê muracatan ra 44ê xo muracatê cinîyan ê. 

Mêrdîn: 139 muracatî

Weçînayîşê 2019î de HDPyî Mêrdîn de 5 beledîyeyî qezenc kerdibî. Dima qeyûmî erzîyayê pêro beledîyeyanê HDPyî ser. Seba weçînayîşê 2024î Mêrdîn de DEM Partîye rê 139 muracatî ameyê kerdene û 50 nînan muracatê cinîyan ê.

Verweçînitiş do bêro kerdene

Hemserekê DEM Partîye yê Amedî Abbas Şahînî muracatî erjnayê û dîyar kerd ke amzetan de mulaqatî yenê kerdene. Şahînî va, “Mulaqatan ra dima do dosyayî reyna bêrê komîsyon û bi sîstemê delegasyonî verweçînitiş bêro kerdene. Verweçînitişî do pêro bajar û qezayan de bêrê kerdene.”

Şahînî dîyar kerd ke verê verweçînayîşî do lîsteya delegeyan bêra daliqnayene û va, “Ma do firsend bidê ke vernamzetî xo bidê şinasnayene. Kesê ke do verweçînayîşî de nîmeyî ra zêder ê rayan (50+1) bigerê benê endamê hemserekîye. Eke vernamzetî meeşkê 50+1î biyarê ca do mabênê 2 vernamzetanê ke hîna zêde rayî dîyayê ci de reyna weçînayîş bêro kerdene.

MA / AMED