‘Muracatkerdişê cinîyan mesajêko muhîm o’

Parlamentera DEM Partî ya Amedî Adalet Kaya polîtîkayê qeyûmî û weçînitişê cayî yê verê ma ANFyî rê erjnayî.

Parlamentera DEM Partî ya Amedî Adalet Kaya behsê tewrbîyayîşê cinîyan kerd û wina qisey kerd: “Zaf muracatkerdişê namzedîye yê cinîyan vera hedefgirewtişê sîstemê hemserekîye û destkewteyanê cinîyan mesajêko muhîm o.”

Kaya qeyûmî sey antîdemokratîkî name kerdî û vat cayê nê caardişo ke îradeyê şarî nas nêkeno huqûq de çîn o. Adalete Kaya nê vatî: “Xora bi serran bi metodanê cîya cîyayan îradeyê şarî nas nêkenê. Qeyûm zî înan ra yew o. Bitaybetî vera destkeweyanê cinîyan hêrişî ameyî kerdene. Nînan ra tewr muhîm zî sîstemê hemserekîye bî û çîyo bîn zî mekanîzmayê ke semedê xurtkerdişê torra paştîdayîşî ameyî ronayene, kooperatîfî, merkezê paştdayîş û hetkarî bî. Qeyûmî tewr zaf vera destkewteyanê cinîyan ê.

Hîrê dewranê peyênan de modelê hemserekîye est o. Hema semedê şaredarîyan fermî nebo zî semedê nê zî têkoşînê ma dewam keno. No xora semedê îqtîdarî meseleya krîtîk a. Nê sey tehdîtî vîneno. Çîyêko hol o îqtîdar tim vera ci yo. Hemserekê ma yê cinîyî hema zaf zîndan de yê û zafê înan zî bado ke xeylêk zîndan de mendî ameyî veradayene. Gultan Kişinake na mana de fîgurêka muhîm a. Rixmo ke cezaya aye qedîyaye hema zî zere de ya. Zaf muracatkerdişê namzedîye yê cinîyan vera hedefgirewtişê sîstemê hemserekîye û destkewteyanê cinîyan mesajêko muhîm o.”

MERKEZÊ XEBERAN