Raya xo bide, sindoqe bipawe û tek merdimî bierşawe

Partîya Çep a Keske Amed ra gazîye kerd û dîyar kerd ke wa şar rayanê xo bido, sindoqan bipawo û tek merdimî bierşawo.

Partîya Çep a Keske, derheqê weçînayîşê turê dîyinî de Amed de buroyê weçînayîşî de kombîyayîşo çapemenîye viraşt.

Kombîyayîşî de Parlamenterê Partîya Çep a Keske yê Amedî Ceylan Akça û Serhat Eren, hemserekê Partîya Çep a Keske, DBP û HDPyî yê Amedî ameyê têhet.

Kombîyayîşî de Hemserekê HDPyî yê Amedî Zeyat Ceylan û parlamentere Ceylan Akça qisey kerd.

Kurdan nêverda Erdogan serbikewo

Ceylanî qiseykerdişê xo de dîyar kerd ke netîce tam bi goreyê waştişî nîya û va, “Sîyaset û sazîyanê Kurdan nêverda Erdogan tura verên de serbikewo. Ma do destûr medê bêusulîyan û tedayan. Ma do 6 rojanê peyênan de mîlyonan îqna bikerê ke şorê sindoqan ser.”

Parlamentere Ceylan Akça zî weçînayoxan rê gazîye kerde û va, “Ma tîya de yê û ma do timûtim tîya de bê. Ma veng a şarê xo danê; ê ça de benê wa bibê, wa şorê sindoqan ser û rayanê xo bierzê.”

YENÎ YAŞAM / AMED