Vernamzetê DEM Partîye do weşano ganî de behsê projeyanê xo bikerê

Verweçînayîşê DEM Partîye do 13-14ê Çeleyî de bêro kerdene. Verê verweçînayîşî vernamzetê 3 bajaranê pîlan do behsê projeyanê xo bikerê.

DEM Partîye qerar girewt ke namzetanê xo yê weçînayîşê 31ê Adare bi verweçînayîşî dîyar bikera. Verweçînayîşê partî do 13-14ê Çeleyî de bêro kerdene. Verweçînayîşî ra ver vernamzetê bajaranê Amed, Wan û Mêrdînî do weşano ganî de behsê projeyanê xo bikerê û xo bidê şinasnayene.

Weşano verên meşte yo

Meşte do weşano verên bêro kerdene û hesabanê partî û Youtubî ser ra vernamzetê Wanî behsê projeyanê xo bikerê.

Weşan do meşte saete 20.00 de dest pêbikero û moderatorîya weşanî do hetê rojnameger Serdar Altanî ra bêra kerdene. 3yê înan cinîyî 12 vernamzetî do bi dora alfabetîkî vejîyê ekranî ser û behsê projeyanê xo bikerê. Seba qiseykerdişî do 5 deqîqeyî bidîyê vernamzetanê camêrdan û 7 deqîqeyî zî bidîyê vernamzetanê cinîyan.

Amed û Mêrdîn

Weşano dîyin do 11ê Çeleyî de Mêrdîn de bêro kerdene. 6ê înan cinîyî 16 vernamezetî do behsê projeyanê xo bikerê. Weşano peyên zî do 12ê Çeleyî de Amed de bêro kerdene. 4ê înan cinîyî 15 vernamezetî do behsê projeyanê xo bikerê.

MERKEZÊ XEBERAN