80 welatan ra seba hereketê azadîye yê Îranî gazîya paştîdayîşî

Sazî û aktîvîstanê 80 welatan gazîye kerde ke, wa pêro welatî paştî bidê hereketê azadîye yê Îranî.

Çalakîyê ke qetilbîyayîşê Jîna Emînî ra dima Îran û Rojhelatî de ameyê dest pêkerdiş dewam kenê. Hetê sazî û aktîvîstanê 80 welatan ra, mabênê înan de serekwezîrî, serekkomarî û wayîrê Xelata Nobelî zî estê seba heteketê azadîye yê Îranî gazîya paştîdayîşî ameye kerdene. 

Metnê malûmatî de ame vatiş ke, “Şarê Îranî bi rayberîya cinîyan sere wedarto. Hetê rejîmî ra xeylê kesî ameyê qetilkerdiş, ameyê îdamkerdiş, raştê tecawizî ameyê, ameyê korkerdiş û ameyê girewtene. Reyna zî şar kuçeyan de xoverdayîşê xo ramneno.”

‘Ganî Muxafizê Şorişî bigerîyê lîsteya terorî’

Dewamê malûmatî de ame vatiş ke, “Ganî girewteyî bêrê veradayîş. Alî Hamaney ra bigere heta fermandaranê Besîcî û îdarekaran rê ganî teda bêra kerdene û bêrê cezakerdiş. Ganî Muxafizê Şorişî bigerîyê lîsteya terorî. Ma do heta peynîye paştî bidê hereketê azadîye yê şaranê Îranî. Ganî her kes paştî bido nê xoverdayîşî.”

MERKEZÊ XEBERAN