Aryen Kome ya ke 4 serrî ra nat Wan de ziwanê dayîke de pererdeyanê kultur û hunerî dana, seba kursê muzîkî qeydan gena.
2016î de qeyyûm erzîya sere Beledîyeya Wanî û Merkezê Hunerî yê Nûda ame padayene. Aryen Kome hetê xebatkaranê Nûda ra 2019î de ameye awankerdene. Aryen Kome ya ke 4 serrê xo dekerdê, ekseri xebatanê muzîkî kena. Kome deyîranê verênan vana û deyîrê Kurdkî yê ke açarîyayê ziwananê bînan hetê kome ra ameyê wendene. Kome hetêk ra zî 5 serreyan ra bigere heta 40 sereyan perwerdeyê tembûre, gîtare, pîano, kemane, zele dano.
Bi ziwanê dayîke perwerdeyê kultur û hunerî
Hunermendanê Aryen Kome ra Mîzgîn Tûrane domanîya xo ra perwerdeyê muzîkê Kurdkî girewto û xo aver de berda. Mîzgîn Tûrane va, “Bi ziwanê dayîke viraştişê xebatanê kultur û hunerî keyfweşîye dano kesî. Ez wazena pêro doman û ciwanî bi ziwanê dayîke perwerdeyê kultur û hunerî bigerê û xebatan bikerê. No seba nifşanê neweyan zaf muhîm o. Ganî her kes bi xesas têbigêro.”
‘Muracatî dest pêkerdê’
Tûrane dîyar kerd ke, seba kursê muzîkî muracatî dest pêkerdê û va, “Muracatê kursê muzîkî dest pêkerdê. Ma perwerdeyê enstrumananê tembûre, pîano, kemane û sazî danê. Kesê 5 serreyî eşkenê muracatê kursî bikerê. Her serran de welatîyî eşkenê seba kursanê muzîkî muracat bikerê. Kesê ke wazenê bi ziwanê dayîke perwerdeyê muzîkî bigerê, ma înan silaynenê Aryen Kome.”
MA / WAN