Awiqat Theune: Tirkîya Îmrali de hiqûqî binpay kena

çarşem 21 îlonê 2022 - 16:29

  • Lucas Theune yo ke seba pêvînayîşê Abdullah Ocalanî muraceat kerdibi va, “Tirkîya nêşkena vaja mi filankesî heqê hêvîye ra muaf girewto. Na bêhiqûqî ya.”

GOZDE ÇAGRI OZKOSE / MA

350 awiqatan seba ke bieşkê Abdullah Ocalanî de pêvînayîş bikerê 13ê Êlule de Wezaretîya Edaletî rê muraceat kerdibi. Derheqê muraceatî de 14ê Êlule de Bruksel de kombîyayîşêk ame viraştene. Awiqatanê îmzakaran ra hiqûqnaso Alman Lucas Theuneyî derheqê muraceatî de qisey kerd.

‘Tecrîdê Îmraliyî bêemsal o’

Awiqat Lucas Theuneyî va, “Tecrîdê Îmraliyî bêemsal o. Tayê hetan ra maneno Guantanamoyî. Yeno zanayene ke Amerîka nêverdayo tîya de girewteyî awiqatanê xo bivînê. La rewşa Îmrali cîya ya. Abdullah Ocalan 2019î ra nat, girewteyê bînî 2015î ra nat nêşkenê awiqatanê xo de pêvînayîşan  bikerê. Tîya de pêro qanûnî yenê binpaykerdiş. Heqê her girewteyî esto ke awiqatanê xo de pêvînayîşan bikero.”

‘Tirkîya rewşe ver tersaye’

Theuneyî va, “25ê Adare 2021î de Abdullah Ocalan heqê telefonî gurînabi. No heq verî cû nêamebi ca. AKP zanayêne ke Kurdî û dinya rewşa sihetî yê Ocalanî mereq kenê û kewenê na rewşe ver. Seba ke nerazîbîyayîşî pîl mebê, AKP tersa û no pêvînayîş ame kerdene. Înan waşt nê zî bikerê hamleyêka polîtîk. Ganî sey ê wextî reyna tehdayêka polîtîk bêra awankerdiş ke awiqatî bieşkê muvekkîlanê xo de pêvînayîşan bikerê û heqanê înan bipawê.”

‘Ganî vera tecrîdî şarê dinya zî vengê xo berz bikerê’

Theuneyî dewamê qiseykerdişê xo de va, “Vera tecrîdî xeylê kampanyayî ameyê viraştene. Tena Tirkîya de wextanê peyênan de 800 awiqatan muraceat kerd. Nika ma 350 awiqatanê Ewrûpayijan muraceat kerd. Her cayê dinya ra 750 awiqatan zî ewro muraceat kerd. La ver ana rewşa xirabe tena têgêrayîşê awiqatan qîm nêkeno. Ganî pêro şarê dinyaye vera tecrîdê Îmraliyî vengê xo berz bikerê. Ma ganî tehdayêk awan bikerê. Eke ma vengê xo berz bikerê, no do seba Erdoganî bibo bedelo sîyayî yo giran.”

‘Tirkîya nêşkena kesî heqê hêvîye ra muaf bigera’

Awiqat Lucas Theuneyî peynî de va, “Tirkîya eşkera kerda ke Ocalan heqê hêvîye ra muaf ameyo girewtene. Heqê Tirkîya çin o ke vaja ez filankesî heqê hêvîye ra muaf gena. Tirkîya bêhiqûqîye kena û sûc kena. Gelo verê ney eşkeno bêro girewtne? Naz î meseleyêka sîyasî ya. Çunke Îmrali binê kontrole Tirkîya de yo. Kes nêşkeno şêro vajo şima tîya de bêhiqûqîye kenê û girewteyan bigero û bivejo. Gelo mekanîzmayêk çin a ke verê na rewşe bigera? Esta. No zî hiqûq o. La senî ke ma va, Tirkîya bîya dewletêka zordare û qanûnî û qerarê mehkemayan xemê aye de nîyê. Abdullah Ocalan ganî awiqatanê xo û keyeyê xo de bieşko pêvînayîşan bikero. No heqêqo bingeyî yo.”

parvê bike

   

Yeni Özgür Politika

© Copyright 2024 Yeni Özgür Politika | Mafên belavkirinê parastî ne.