Bakirhan: Ma do Îttîfaqê Ked û Azadîye hîra bikerê

Hetkarê Hemserekê Pêroyî yê HDPyî Tuncer Bakirhanî va, “Îttîfaqê Ked û Azadîye îttîfaqêko tarîxî yo. Ma do nê îttîfaqî hîra bikerê.

Endam û îdarekarê HDPyî Dîlok de Rêxistinanê Komela sîvîle de ameyê têhet. Hetkarê Hemserekê Pêroyî yê HDPyî Tuncer Bakirhan, Wekîla HDPyî ya Êlihî Feleknas Uca, Wekîlê HDPyî yê Rihayî Omer Ocalan, Wekîlê HDPyî yê Dîlokî Mahmut Togrul, Wekîlê HDPyî yê Rihayî Nusrettîn Maçîn, temsîlkaranê rêxistinan û endamê partîyan beşdarê têhetameyîşî bîyê.

Têhetameyîşî de Tuncer bakirhanî qisey kerd û va, “Tirkîya ameya çatrayîrêk. Krîzê ekonomîyî giran o. Seba ke problemi bêrê çareserkerdiş partîya ma xebitîyena. Faşîzm cayê xo kerdo qeyîm û seba ke muxalefeto hêzdar çin o îqtîdar cuya xo ramneno.”

Îttîfaqê Ked û Azadîye

Bakirhanî va, “Ma rayîranê demoktarîkbîyayîşî gêrenê. Îttîfaqê ma newe yo la vîyarteyê ci yo tarîxî esto. Ma wazenê îttîfaqo hîra awan bikerê. Yan ma bêveng manenê yan zî ma vengê xo kenê berz. Seba ke ma vengê xo berz bikerê, ma ganî bêrê têhet. Ma pêro muxalîf û demokratan silaynenê nê îttîfaqî. Ma do îttîfaqê xo hîra bikerê û nê têhetameyîşî zî seba ney yenê kerdene. Ma bedele giranî daye la l-ma hema zî pay ra yê. Seba ke îqtîdar bikewo, ma ganî dormaleyê na masa de bêrê pêser. Ma do yewbînan goştarî bikerê. îttîfaqê ma vano ma mecbûrê 2 rayîran nîyê. Îttîfaqê Miletî esto la îhtîyacîya ma reformêk o. Ma bawer nêkenê ke no îttîfaq meseleya Kurdan bi rayanê demokratîkan çareser bikero. Derheqê meseleya Kurdan de bernameyê înan çin o. seba hemwelatîya têduşte bernameyê înan çin o. Alternatîfêk esto. Ma do sîstemêko azad û demokratîk awan bikerê.”

‘Adresê çareserîye HDP yo’

Badê pêşnîyazan Feleknas Uca qisey kerd û va, “Polîtîkayanê şerî ver Tirkîya ver bi hîşarî şona. Ma ganî vernîyê nê hêrîşan bigerê û vera nê konseptî de vinderê. Adresê çareserîye HDP yo. Ganî şar hîna zêde paştî bido HDP û ma ganî rayîrê 3yinî pêro pîya awan bikerê.”

MA / DÎLOK