Bernameyê FîlmAmedî dîyar bi

Festîvalî de do 31 belgefîlmî bêrê ramojnayene. Tayê nê belgefîlman hetê derhêneranê Başûr û Rojhelatî ra ameyê antene.

Festîvalê Belbefîlman ê FîlmAmedî do emser reya 8ine mabênê 27ê Êlule û 1ê Teşrîna Verêne de Amed de bêro viraştene. 31 belgefîlmî do bêrê ramojnayene û tayê nê belgefîlman hetê derhêneranê Başûr û Rojhelatî ra ameyê antene.

Festîval do 27ê Êlule, roja Çarşemeyî Şanoya Bajêr a Amedî de, bi merasîmê akerdişî dest pêbikero. Merasîmî de do fîlmê ‘Zimanê Dayikê’ yê Sarkew Mesgarîyî bêro ramojnayene.

Rojanê bînan de zî do belgefîlmê kilm û dergi yê  sey “13ê Gulane” yê Tariq Totiq Qadirî, “Çiya, bi nêrîna jinan” yê Rebwar Mahmoud Pourî, “Cîhana di serê min de” yê Yalçin Çîftçîyî, “Bêdewîya nepen a Iraqî” yê Sahîm Omer Kalîfayî bêrê ramojnayene.

Fîlmê derhêneranê cinîyan zî bernameyî de yê

Festîvalî de xeylê fîlmê derhêneranê cinîyan estê. Fîlmê “Sîmir’ yê Helîn Çelîke, yê “Ez, dayika min û toz” yê Çagla Gîllise, yê “Vegera Malê” yê Dîlan Engîne, yê “Hêza” yê Derya Denîze nê fîlman ra çend hebî yê.

Fîlmê derhêneranê xerîban zî do bêrê ramojnayene. Julia Lazarus, Pablo Tosco û Migue Roth nê derhêneran ra çend hebî yê.

Bernameyê FîlmAmedî do 1ê Teşrîna Verêne roja Yewşemeyî bi ramojnayîşê fîlmê “Siqiq û Panter” ê Rêber Doskyî biqedîyo. Fîlmê festîvalî do Şanoya Bajêr a Amedî, Salona Sînemaye ya Bezgîn Bekîrî, Zarok MA û Komeleya Kultur û Hunerî ya Dîcleyî de bêrê ramojnayene. 

BÎANET