Bi kerdenanê serranê 90an ame remnayîş

Sînemager Suphî Orhan 30ê Hezîrane de embazê xo berdibi teyyaregehê Izmîrî. Agêrayîşî de hetê 3 kesan ra ame remnayîş. Înan xo sey endamê îstîxbaratî dabi şinasnayîş.

Suphî Orhan hetê 3 kesanê ke xo sey endamê îstîxbaratî dabî şinasnayîşî ra ame remnayîş. Înan heta ereyê şewe o mezelcayan ra çarna û îşkence pêkerd. Dima înan Suphî Orhan nêzdîyê qezaya Menderesî de verda. 

Ci rê heqeretî bîyê û raştê îşkenceyî ameyo

Suphî Orhanî derheqê meseleye de vato, “Roja 30ê Hezîrane mi embazê xo 8.30î de berdibi teyyaregehê Izmîrî. Badê ez şîya garajê bajarî de bine darêk de ronişta. 3 kesî ameyê verê mi û înan xo sey polîsan da şinasnayîş. Înan nasnameyê mi waşt û va ma polîs ê. Badê înan ez bi zor vista wesaîtêk û ez raştê îşkenceyan ameya. Mi va çîyo ke şima kenê bêhiqûqî yo. înan va, ‘Ti çira ameyî tîya?’ û înan va ti ganî çîyanê ke ti zanê m ara vajê û nê bajarî biteriknî. Ez no mabên de raştê îşkenceyan û heqeretan ameya. Dima înan ez berda mezelcayêk û îşkenceyî uca de zî dewam kerdê. Înan mi ra waşt ez ajantî bikerî. La mi înan ra va şima xeletî kenê û no zî bêhiqûqî yo. Eke derheqê mi de qerarê binçimgirewtişî esto w abi awayêko resmî bibo. Şima bi no şekil wazenê mi sûcdar bikerê. Înan dima pereyî teklîf kerdê. Wexto ke mi va ney, kincê mi dirnayê û ez eşta erd û ez kuwaya. No wina heta saete 19.00î dewam kerd.”

‘Ganî reaksîyonê komelkî bêrê dayene’

Suphî Orhanî va, “Badê îşkenceyan, înan ez berda cayêk û înan ez kerda zit û 3 fotografê mi antê. Badê înan ez tehdît kerda û înan va ganî ti mîyanê 3 rojan de nê bajarî biteriknî û ez wesaît ra arda war. Saete 00.55 bî. Îşkenceyan ver ez nêşkayêne pay ra vinderî. Bi zor heta 03.00 ez peyatî şîya û mi xo rasna dingêka texsîyan. Bi no qeyde mi xebere da keyeyê xo û awiqatanê xo. Înan ke serranê 90an de îşkenceyî kerdêne neçarîya xo ver kerdêne. Zanayêne ke kes înan ra nêterseno. Ewro zî eynî kerdenanê xo kenê û neçarîya xo ver kenê. La çîyo ke ameyo mi ser şexsî nîyo. No komelkî yo. No ewro ameyo mi ser, siba do bêro kesanê bînan ser. Ganî vera nê kerdenan reaksîyonê komelkî bêrê dayene. Ganî raya pêroyî reaksîyonan bida ke çîyê winasî meqewimîyê.”

MA / IZMÎR