Çîftyurek: Ma ganî vera hêrişan bibê yew

MA / Mujdat CAN / AMED

Parlamenterê Partîya Çep a Keske Sînan Çîftyurekî dîyar kerd ke ganî Kurdî vera hêrişan bibê yew.

4ê Teşrîna Verêne ra nat Tirkîya hêrişê Bakur û Rojhelatê Sûrîyeyî kena. Nêweşxaneyî, santralî, depoyê xeleyî û îstasyonî hedef gêrîyayê û hêrişan de 2yê înan domanî 47 kesan cuya xo vîndî kerde. 

Parlamenterê Partîya Çep a keske yê Wanî Sînan Çîftyurekî dîyar kerd ke ganî vera nê hêrişan yewîtîya Kurdan bêra awankerdene.

‘Statuya Kurdan rê bêtamulîye’

Çîftyurekî dîyar kerd ke verê çalakîya Enqera zî Bakur û Rojhelatê Sûrîyeyî rê hêrişî ameyêne kerdene û hêrişanê pêyênan de awanîyê sivîlî hedef gêrîyayê. Ey dîyar kerd ke statuya Kurdan rê bêtamulîye ver hêrişî benê û va, “Rojhelato Mîyanên reyna bi warê şerî. Xususen Tirkîya û Îran ganî Iraq û Sûrîye biîstîqrar bibê. No yeno no vate; wazenê Kurdistanê Federeyî û Îdareyê Xoserî yê Rojavayî orte ra wedarê. Vanê ma meşke wedarê zî, ma înan zeîf bikerê.”

‘Merdimî mirenê, dinya temaşe kena’

Çîftyurekî dîyar kerd ke Kurdan vera DAÎŞî şer kerd û va, “Eke DAÎŞ binnêkewtêne, ewro Rojhelato Mîyanên, Ewrûpa û dinya de hizur çin bi. Ganî vera nê hêrişan koalîsyono mîyanneteweyî û hêzê mîyanneteweyî hetê Kurdan de ca bigerê. Çar leteyê Kurdistanî û dîaspora de ganî Kurdî vejîyê meydanan û çalakîyanê pîl bikerê. Her roje merdime ma mirenê û dinya zî temaşe kena. Ganî Neteweyîyê Yewbîyayeyî vera hêrişan têbigêra. Na statü tena seba Kurdan ney seba pêro Rojhelatê Mîyanênî ya.”

‘Bê Kurdan îmkanê demokrasîyî çin o’

Çîftyurekî va, “Bi hezaran ciwananê Kurdan Kobanî de canê xo da û Kobanî ewro yeno bombakerdiş. Hêzê mîyanneteweyî qey menfeatê xo paştî nêdanê nê xoverdayîşî. Masaya Rojawanê Başurî yê Asya zeîf bena û beno ke biqedîya. Haamasî reyde beno ke şerê Rojhelatê Mîyanênî dewam bikero. Eke hêzê mîyanneteweyî wazenê Rojhelato Mîyanên de haştî û demokrasî awan bibê, bê Kurdan îmkanê xo çin o. Ganî paştî bidê Kurdan. Eke nêwazenê rêxistinê sey DAÎŞî vejîyê, ganî paştî bidê Kurdan.”

Çîftyurekî peynî de ke ganî destkewteyê Kurdan bêrê pawitene û va, “Ma ganî hedîseyanê 4 leteyî sey meseleya xo bivînê û ma ganî çar leteyê welatî bipawê.”