Binçimgirewtişê rojnamegeran ame protestokerdiş: Ma do rêça xo ra şorê

çarşem 6 tîrmehê 2022 - 00:26

3 rojnamegerî Enqara de hetê polîsan ra darb bîyê û gêrîyayê binê çimî. 

Komeleya Rojnamegeran a Dîcle û Firatî û Platformê Rojnamegeranê Cinîyan ê Mezopotamyayî waşt Enqara de binçimgirewtişê 16 rojnamegeranê Kurdan bi malûmatê çapemenîye protesto bikerê. polîsan gale kerde înan ser û 3 rojnamegerî bi darbbîyayîşî gêrîyayê binê çimî. Muxabîrê Ajansê Mezopotamyayî yê Enqera Deniz Nazlim û rojnamegerî Sîbel Yukler û Yildiz Tar gêrîyayê binê çimî.

Rojnamegeran seba embazanê xo malûmatêk da. Malûmatê çapemenîye temsîlkarîya DÎSKî ya Enqarayî de ame dayene. Malûmatî de dezge û sazgeyan ra xeylê kesî ameyê têhet. 

‘Ma do raywanîya heqîqetî biramnê’

Malûmatî de bi nameyê Komeleya Rojnamegeran a Dîcle û Firatî rojnameger Ozgur Paksoyî qisey kerd û va, “Polîsan gale kerde ma rê. Embazê ma bi îşkenceyan û darban gêrîyayê binê çimî. Ma do vera şîdetê polîsan heqê xeberdayîşî bipawê. Cayê karanê ma 28 rojî yo ke binê ablûkayî de yê. Dewlete 28 rojan ra nat gêrena sûcêk la nêdîyo. Ê rojnamegerîye sey sûcêk vînenê la ma do raywanîya heqîqetî biramnê.”

‘Ma ganî wayîrê heqê xebergirewtişî bivejîyê’

Platformê Rojnamegeranê Cinîyan ê Mezopotamyayî ra Oznur Degere va, “Ma makînaya fotografan tena hacetêk nîya. Na heqîqetê ma dana teber. No mîras Rojnameyê Kurdistanî ra nat dewam keno. No mîras Apê Mûsayan ra, Gurbetellî Ersozan ra mendo. Ma wazenê wayîrê nê mîrasî bivejîyê. La hemverê ma de zîhnîyetêko faşîzan esto. Ma ganî pêro pîya wayîrê heqê xebergirewtişî bivejîyê.” Malûmat bi sloganê ‘Vengê çapemenîya azade nîno birnayîş’î qedîya.
MA / ENQERA

 

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.