- Hemserekê Botan-Derî Metîn Kiliçaslanî dîyar kerd ke, komeleya înan rê eleqeyo weş esto û agahî da ke dert bi dayîşê dersan kenê.
Serranê peyênan de Bakûrê Kurdistanî de Kurdkî hetê xeylê kesan ra qisey nêbena. Nê semedî ra zî qiseykerdişê Kurdkî kêmîyeno û bala domananê Kurdan şina Tirkî ser. Seba ke verê nê çîyan bêrê girewtiş komeleyê ziwanê Kurdkî yenê akerdene. Heta nika xeylê bajaranê Kurdan de komeleyê ziwanî ameyê akerdene. Tewr peynî 31ê Teşrîna Verêne de Sêrtî de Komeleya Cigêrayîşanê Kultur û Hunerî ya Botanî(Botan-Der) ameye akerdene.
Hemserekê Botan-Derî Metîn Kiliçaslanî derheqê komeleye û xebatanê înan de Xwebûnî rê qisey kerd. Kiliçaslanî va, “Ma ewnîyenê ça ra ziwanê xerîban yeno qiseykerdiş. Seba ameyoxê şarê ma û seba domananê ma akerdişê komeleye elzem bi. Ma waşt verê asîmîlasyonî bigerê. Rastîya xo de çîyo tewr muhîm ziwanê ma yo.”
Sêrtijî eleqe mojnenê Botan-Derî
Dewamê qiseykerdişê xo de Kiliçaslanî va, “2 hefte yo ke ma komeleya xo akerda. Komeleya ma rê eleqeyê şarî esto. Şar komeleye rê wayîr vejîyeno û têkilîyê germî awan benê. Ma heta nika 2 sinifî herde kerdê. Rêxistinanê sivîlan ra beşdarbîyayîşo pîl esto. Nika çar mamosteyê ma estê û ma wazenê hûmara mamosteyanê xo bizêdînê.”
Kursî do ewro dest pêbikerê
Metîn Kiliçaslanî peynî de va, “Ma seba dersan hedreyîya xo kerda. Ma do bi hewayêkî onlîneyî dersanê xo bidê. Ma wazenê hefte de 2 rojan kurs bidê û dersî do hem roj hem zî şewe bibê. Ma şarê Sêrtî ra vanê; wa bê ziwanê xo menanê, wayîrê ziwanê xo bivejîyê û ziwanê xo aver de berê.”
XWEBÛN / SÊRT
parvê bike
Nûçeyên ku dikare bala we bikşîne
