Bulbul: AKP wazeno Elewîtîye rê qeyyûm tayîn bikero

Parlamenterê HDPyî Kemal Bulbulî va, “AKP pêro prosesanê teduştîye wdareno û bi zîhnîyetê xo wazeno Elewîtîye rê qeyyûm tayîn bikero.

Serektîya Kultur û Cemxaneyî yê Elewî Beştaşîyan bi qerarnameyê Tayyîp Erdoganî ameye ronayene. Endamê serektîye do hetê Tayyîp Erdoganî ra 3 serran de reyêk bêrê weçînayîş.

Derheqê meseleye de parlamentere HDPyî Kemal Bulbulî qisey kerd û dîyar kerd ke, do serektîye meseleyan rê meba çareserîye.

Elewîtîye rê qeyyûm tayînkerdiş

Kemal Bulbulî va, “Na serektîye ver do probleme neweyî peyda bibê. Cemxaneyan sey îbadetxaneyan nêvînenê û hetê Serekkomarî ra do endamê na serektîye bêrê tayînkerdiş. Mîyanê nînan de do elewîyî ca megerê. Bin ê zîhnîyetê nînan, elewîtîye rê qeyyûm yeno tayînkerdiş.”

‘Qesre cayê çareserkerdişî nîya’

Bulbulî va, “Elewîyî teduştîye wazenê. Mas ey HDPyî 5ê Gulane 2022yî de Dêrsim de kampanyaya ‘Elewîyan rê hemwelatîya têduşte’ da dest pêkerdiş û kampanyaya ma dewam kena. Ez emser 17 bajaran ra û xeylê dewan ra gêraya. Qet yew sazîya Elewîyan, nê qerarnameyî û qanûnî qebûl nêkena. Hetê nînan ra no ame îfadekerdiş. Vîzêr sazîyê Elewîyan ameyê vernîya meclîse ke waştişanê xo îfade bikerê la raştê hêrîşa polîsan ameyê. Şima hem temsîlkaranê Elewîyan darb kenê hem zî qesre de çareserîyan peyda kenê. Qesre cayê çareserkerdişî nîya. Elewîtîye bawerîya mazlûman a. Elewîyî do meseleyanê xo bindestan, Kurdan, cinîyan û Tirkmenan reyde çareser bikerê. Cayê çareserkerdişê meseleya Elewîyan qesra AKPyî nîya.”

MA /ENQERA