Elewîyî vera înkarî şîyê vernîya meclîse

• Rêxistinê Elewîyan, vera qanûnê ‘Serektîya Cemxane û Kulturî yê Elewî Bektaşîyan’ şîyê vernîya meclîse.

Ewro do qanûnê ‘Serektîya Cemxane û Kulturî yê Elewî Bektaşîyan’ ser o meclîse de pêvînayîşî bibîyenê. Rêxistinê Elewîyan, vera nê qanûnî ewro şîyê vernîya meclîse. Hetê rêxistinanê Elewîyan waştişê hemwelatîya têduşte ard ziwan. HDP, CHP, TIP, KESK û xeylê sazîyanê sîvîlan paştî da çalakîya Elewîyan.

Rêxistinî vernîyê meclîse de ameyê têhet û hetê înan ra ‘Elewîtîye nêkeweno tewre, qanûnê xo têpîya biancê’, ‘AKP destê xo bawerîya ma ser ra biance’, ‘Cem îbadetê ma yo, cemxaneyî zî îbadetxaneyê ma yê’yî ameyê eştene.

‘Îqtîdar Elewîyan înkar keno û Elewîtîye bi goreyê xo name keno’

Malûmato şerîk hetê Serekê Federasyonê Komeleyanê Elewîyan Celal Firatî ra ame wendene. Firatî va, “Vera Elewîyan polîtîkayê asîmîlayonî yê AKPyî dewam kenê. Elewîyî seserra verênî ya Cumhûrîyetî de sey hemwelatanê têduştan nêameyê dîyayene û nika zî wazenê Elewîyan kokanê xo ra dûrî bifînê. Nê qanûnî de îbadetê Elewîyan o cem û cemxaneyî sey problemi yenê dîyayene. Meseleya Elewîyan bi çend çîyanê qijkekan çareser nêbena.”

Dewamê malûmatî de Firatî va, “No qanûn, Elewîtîye mîyanê Sunnîtîye de sey çîyêkî kulturîyî ramojneno, bawerîya ma û nasnameyê ma rê heqeret keno. Qerarê Mehkemaya Heqanê Merdiman a Ewrûpayî û waştişê Elewîyan orte de yê la AKP hema zî çareserîye beton û asin de vîneno. Ma serran ra nat îfade kenê û tîya ra reyna vanê. Ganê îtîdar hinî fam bikero, bivîno û waştişan ca biyaro. Elewîyî estê, Elewîyî tîya de yê û Elewîtîye heq a. Ganî hemwelatîya têduşte bi Qanûnê Bingeyinî bêra awankerdiş.”

ANF / ENQERA