Merkezê Pêroyîye Komeleyanê Elewîyan ê Demokratîkan (DAD) derheqê nîqaşanê serê ‘Dêrsim’î de eşkerayîyêka nuştekîye daye.
Merkezê Pêroyî yê DADî vera nîqaşanê serê Dêrsimî de nêrazîbîyayîş mojna û vat ke çew do nêeşko nameyê Dêrsimî vîrê şarê kurdî ra vejo.
Eşkerayîya DADî wina ya:
“Her roje nameyê cografyaya Erdê Dewreşî û sere de Seyîd Rizayî erjê şarê ma bi ziwanê nefretî yenê hedefkerdene. No çî bi di metodan yeno kerdene; bi ziwanê nefret û kînî yenê kerdene û ziwan, nasname û bawerîya Dêrsimî sey dişmenî yenê dîyene. Metodo diyîn zî no yo ke tay kesî zî wina mojnenê ke Dêrsimî qebul kenê la dima cade hêrişê erjanê Dêrsimî kenê û bi nê hawayî kenê ke şarî ra rayan bigêrê.
Vîrê ma de yo ke 2011 de Erdoganî qaşo senî ‘Dêrsimî ra efû waşta’ û Parlamenterê CHPyî Onur Oymenî zî senî Meclîs de heqaretî kerdî. Ewro mabênê Bahçelî û Ozgur Ozelî de zî heman çi qewimîyeno. Nê wird serebûtî zî çimê ma de eynî yê.
Dêrsim seba ke qey ferasetê dewlete yê merkezperestî tehluke bîbî terteleyêko pîl dîbî. Êyê ke nê dejanê Dêrsimî de têrî nênê name û erjanê Dêrsimî kenê hedef ke ma do qetî ney qebul nêkerê.
Ma do nimûneyanê sîyasetmedaranê pragmatîstanê ke mexdûr û qirkeran zereyê heman cumle de yad kenê, tim teşhîr bikerê; vera ferasetê faşîstî yo ke Dêrsimî înkar keno zî tim têkoşîn bikerê.
Dêrsim seba ma nameyêko basîd nîyo! Nameyê Dêrsimî temamîya erjanê ma yê tarîx, herr, kultur, erd, ziwan û komelî ya! Çew nêeşkeno seba rantê sîyasîyî nê nameyî bişuxilno! Û çew nêeşkeno û do nêeşko nê nameyî mezgê ma ra bierzo!”
XWEBÛN
parvê bike
Nûçeyên ku dikare bala we bikşîne
