Dewaya cayê mezela Şêx Seîdî red bîye

Mehkemaya Îdareyî ya 5inî ya Enqera, dewaya ke seba cayê mezelanê Şêx Seîd û embazanê ci amebî akerdene red kerde.

Baroya Amedî, Komeleya Kultur û Paştîdayîşî ya Şêx Seîdî, torn û vasîyê Şêx Seîdî Kasim Firatî seba ke cayê mezelanê Şêx Seîd û 46 embazanê ci muracatê Wezaretîya Karanê Zereyî kerdibi. Wezaretî cewab nêdabi muracatê înan. Dima Mehkemaya Îdareyî ya 5inî ya Enqera rê muracat ame kerdene.

Dewa do bikirişîya îstînaf

Mehkema, beyanetê Wezaretîye yo ke ‘derheqê cayanê mezelan de arşîvan de qeydî çin ê’ ser o derheqê dewa de qerarê redî da. Hetê keyeyê Şêx Seîdî ra do dewa bikirişîya îstînaf û  qererî rê îtîraz do bêro kerdene.

Baroya Amedî derheqê qerarî de malumatêk weşana û va, “Derheqê dewa de qerar ameyo dayene. Hetê mehkema ra cigêrayîşê elzemi nêameyê kerdene û bi beyanetê Wezaretîye qerarê redî ameyo dayene. Vera qerarî do bi muracatê îstînafî xoverdayîşo hiqûqî bêro ramitene.”

MA / AMED