Mehkema, derheqê mezela Şêx Seîdî de Wezaretîya Karanê Zereyî ra malûmat waşt

• Mehkemaya îdareyî ya 5ine ya Enqereyî, derheqê mezela Şêx Seîdî de pêro malûmat û dokumanî waştê. 

Mehkemaya îdareyî ya 5ine ya Enqereyî, derheqê mezela Şêx Seîdî de pêro malûmat û dokumanî waştê. Wezaretîya Karanê Zereyî muracaatê keyeyê Şêx Seîdî red kerdibi.

Seba ke cayê mezela Şêx Seîd û yê embazanê ci bêrê eşkerakerdiş, Baroya Dîyarbekirî, Komeleya Perwerde, Kultur û Paştîdayîşî ya Şêx Seîdî û tornê Şêx Seîdî Kasim Firat 15ê Sibate de muracaatê Wezaretîya Karanê Zereyî kerdibi. Muracaatê înan amebi redkerdiş. Mehkemaya Îdareyî ya 5ine ya Enqereyî, wezaretîya Karanê Zereyî ra derheqê meseleye de pêro malûmat û dokumanî waştê. Dewa qanûnanê muqaveleyê Cenevreyî ser ra ameye akerdene û mekkema zî waştişê înan heqdar dî.

Mehkema 30 rojî wext da

Endamê Baroya Dîyarbekirî Awiqat Mehdî Ozdemîrî va, “Ma muracaatê Wezaretîya Karanê Zereyî kerd la muracaatê ma ame redkerdiş. Ma zî narey Mehkemaya Îdareyî ya 5ine ya Enqereyî rê muraacat kerd û mehkema waştişê ma heqdar dî. Mehkema va, “97 serran ra ver hedîse qewimîyaya û cayê mezele keyeyê ci ra ameyo mîyankerdiş. Ganî wezaretîya Karanê Zereyî mîyanê 30 rojan de pêro malûmat û dokumanan birasna mehkema.” Ozdemîrî va, “Na mehkema ra zî netîceyêk nêvejîya, ma do muracaatê Mehkemaya Heqanê Merdiman a Ewrûpayî bikerê.”

MA / ENQERA