Serekê Komeleya Şêx Seîdî: Planêko gemarin kewto kar

Serekê Komeleya Şêx Seîdî Mehmet Qasim Firatî dîyar kerd ke nameyê Şêx Seîdî ser ra planêko gemarin yeno ramitene.

Tornê Şêx Seîdî Ruşen Firat, parekerdişanê medyaya sosyale ver 26ê Kanûne de Xinis de gêrîya binê çimî. Ceza dîyaye Firatî ke ganî aşmêk hesabanê xo ra her roje beyraqa Tirkan pare bikero. Baroya Amedî HSKyî rê gereyê hakimî kerd.

‘Planêko gemarin kewto kar’

Mehmet Qasim Firatî qerer o ke derheqê birarzayê ci de ameyo dayene şermezar kerd û dîyar kerd ke nameyê Şêx Seîdî ser ra planêko gemarin yeno ramitene. Firatî va, “Çunke zanê ke bawerî û îdelojîyê înan çi beno bibo, pêro Kurdî wayîrê Şêx Seîdî vejîyenê. Şêx Seîd erjê nê şarî yo û wazenê ey ser ra planêko gemarin biramnê.”

‘Tesaduf nîyo’

Firatî derheqê cezaya ke dîyaya Ruşen Firatî de va, “Birarzayê mi 2014î de konferansê HDPyî de fotografêk anto û şîyo Mintiqaya Kurdistanî û fotografêk anto. Birarzayê mi ra vanê ‘To verî qet verê beyraqa Tirkan de fotograf anto?’ û bêhiqûqî ceza danê ci ke ganî aşmêk medyaya sosyale ser ra beyraqa Tirkan pare bikero. Seba ke hesabê ci akerde yo tim raştê hêrişanê nîjadperestan yeno. No nîno qebulkerdene.”

‘Zîhnîyetê Esat Oktayî yeno ramitene’

Firatî va, “Zîhnîyetê ê hakimî gemarin o. Senî ke Esat Oktayî zîndanê Amedî de girewteyan rê marşî dayêne wendene, zîhnîyetê ci ewro zî yeno ramitene. Wazenê  ceza bidê pêro welatperweran û haştîwazan. Ez zî ameya tehtîdkerdiş la ez nê tehtîdan ra nêtersena. Şêx Seîdî sehpaya îdamî de va “Şima ewro cuya ma gene la ma şima rê sere nênayo ro”. Ma zî sere nênanê ro. Ma vizêr estî bî, ewro est ê û ma do meşte zî bibê. Ganî komelê ma seba heq, edalet û hiqûqî sere menê ro.”

MA / AMED