Dewlete cayê mezela Şêx Seîdî eşkera nêkena

Şêx Seîd û embazê ci 1925î de Dîyarabekir de ameybî dardekerdiş. Ser ra 97 serrî vîyartê la dewlete cayê mezelanê înan eşkera nêkena. 

Şêx Seîd û 46 embazê ci 29ê Hezîrane 1925î de Dîyarbekir de, meydanê Berêkoyî de ameyê dardekerdiş. Dardekerdişê înan ser ra 97 serrî vîyartê la hema zî dewlete cayê mezelanê înan eşkera nêkena. Yeno îddîakerdiş ke, tirmê înan kişta ordûevî de ameyê wedartiş. Keyeyê Şêx Seîdî 1979î ra nat meseleya mezele ser o têgêreno la nêtîceyêk nêameya girewtiş. 

‘Înan vera înkarî xo ver da’

2014î de Komeleya Şêx Seîdî ameye ronayene. Tornê Şêx Seîdî Mehmet Kasim Firatî derheqê serrgêra dardekerdişî de qisey kerd. Firatî va, “Şêx Seîd û embazanê ey vera polîtîkayanê îmha û înkarî xo ver da. Înan seba xoverdayîşê miletê Kurdan xo ver da. Heteketê înan çar parçeyê Kurdistanî de veng da. Şêx Seîd û embazê ci erjê ma yê. Ma do timûtim wayîrê înan bivejîyê.”

‘Erjê Kurdan yenê îmhakerdiş’

Mehmet Kasim Firatî va, “Dewlete wazena Kurdî erjîyayanê xo, xo vîrî ra bikerê. Coka erjê Kurdan yenê îmhakerdiş. Cumhûrîyet bi înkar, îmha û zulmî awan bi. Wazeno erjanê tarîxîyan îmha bikero. Mezelê Şêx Seîd û embazanê ey hetê dewlete ra yenê nimitiş. Muhatabê dewaya ma Wezaretîya Karanê Zereyî ya. Dewa Enqera de yena vînayene. Eke uca zî red bikero, ma do şêrê îstînaf. Dima ma do dewaya xo bikirişnê mehkemayanê mîyannetewîyan. Na meseleya şexsekî nîya. Meseleya erjêkî tarîxî ya. Ganî her kes wayîrê na meseleye bîvejîyo.”

MA/AMED