DFG: Mîrasê Evranî do xoverdayîşê şarê Kurdî de biciwîyo

DFGyî derheqê rojnameger Seyît Evranî de mesajê sereweşîye weşana.

Rojnameger Seyît Evran, Bakûr û Rojhelatê Sûrîyeyî de newaşîya xo ver tedawî dîyêne û 22yê Êlule de cuya xo vîndî kerde. Hetê Komeleya Rojnamegeran a Dîcle Firatî (DFG) ra bi sernameyê “Xatirayê Seyît Evranî do xoverdayîşê çapemenîya azade de biciwîyo” mesajê sereweşîyê ame weşanayene. 

DFGyî mesajê xo de va, “Ma xebera şehadetî ya kedkarê çapemenîye Seyît Evranî girewte û ma zaf bîyê xemgîn. Seyît Evranî emrê xo da xoverdayîşê şarê Kurdî. Çar leteyê Kurdistanî de bi qeleme û makînaya xo hedîseyî qeyd û neqil kerdê. Ey warê şerî terk nêkerdê. 1990î de Gurbetellî Ersoze reyde dest bin a raywanîya pîroze kerde û Bakûr, Başûre, Rojhelat û tewr peynî zî Rojava de ramna. Çîyê ke amebî şarê Kurdî ser û rastîya şerî bi xeta çapemenîya azade hetê ey ra rasayê raya pêroyîya dinya. Seyît Evran, bi enerjîyê xo, heyecanê xo û bawerîya xo no rayîro pîroz de bi tewrê karwanê ‘Şehîdanê Çapemenîya Azade’. Xatirayê ci û mîrasê ci do xoverdayîşê pîlî yê şarê Kurdî de biciwîyê.”

MA / AMED