Wendekarê Seyîd Evranî: Ey rojnamegerê şorişgêrî rasnayê

MA / Emrullah ACAR / RIHA

Wendekarê rojnameger Seyîd Evranî Ekrem Berekatî va, “Ey rojnamegerê şorişgêrî rasanayê. Bi tecrubeyê xo rayîrê embazan roşn kerd.”

Kedkaranê çapemenîya azade ra rojnameger Seyîd Evran, 22yê Êlule de 54 serrîya xo de cuya xo vîndî kerde. 30 serrî kede da û bi vîrê çapemenîya azade. Çar leteyê welatî ra gêra û mîrasê çapemenîya azade dewrê embazanê xo kerd. 2012î de şi Rojava û bi şahidê ‘Şorişê Rojava’yî. Seba ke hedîseyan birasno pêro dinya wendekarî rasnayê.

‘Hêverî heval Seyîdî paştî daye’

Şorişî ra dima Rojava de Akademîya Çapemenîye ameye ronayene û rojnameger Ekrem Berekat zî 6 wendekaranê verênan yê akademî ra yew bi. Berekatî va, “Wexto ke Evran ame Rojava, raşta zî orte de çapemenîye çin bîye. Tedayanê Hukmatê Şamî ver heta o wext rojnamegerê Rojavayî çin bî. Badê Şorişî, çapemenîya azade ra îhtîyacî peyda bîye. Ganî xoverdayîşê kurdan, destkewteyê înan neqlê raya pêroyîye bibîyêne. Ma çend embazê bêtecrubeyî ameyê têhet û ma dest bi xebate kerde. Hêverî heval Seyîdî paştî daye ma. Tena paştî zî nêda, ame Rojava û mîyanê xebate de ca girewt. Ez xo şansdar vînena.”

‘Pêro embazan rê bi çila’

Berekatî dîyar kerd ke ey tim waştêne zanayîşanê neqlê embazan bikero û va, “Waştêne pêro tecrubebanê xo dewrê ma bikero. Ewro Bakur û Rojhelatê Sûrîyeyî de xeylê sazîyê çapemenîye estê. Her asta nê sazîyan de keda Seyîd Evranî esta. Bi tecrubeyê xo pêro embazan rê bi çila. Ey reyde şînasîbîyayîş û ci ra perwerde girewtiş seba ma şansêko pîl bi. Key ma bikewtêne teng, ma paştîya xo dayêne heval Seyîdî û ma ci ra hêze girewtêne.”

‘Her kes nêşkeno bibo rojnamegero şorişgêr’

Berekatî dîyar kerd ke merdim nêşkayêne ey masa de bivîno. O timûtim warê xeberan de bi û va, “Ewro kesê ke Bakur û Rojhelatê Sûrîyeyî de kesê ke rojnamegerî kenê zafê înan rojnamegerîye heval Seyîdî ra musayê. Ey tim vatêne ‘Her kes eşkeno bibo rojnameger la her kes nêşkeno bibo rojnamegero şorişgêr. Mar ê rojnamegerê şorişgêrî lazim ê’. Bin ê fikrî xeylê rojnamegerî rasnayê. Ez Rojavayaij a la mi nêzanitêne Rojava de Çerkezî estê. Heval Seyîd zanayêne. Ma înan ser o cigêrayîşêk kerd û ma pîya şîyê Minbîc.”

‘Ti heta hîs mekerê, ti nêşkenî xebere binusî’

Berekatî behsê vîrardeyê xo û Seyîd Evranî kerd û va, “2012î de ma heval Seyîdî de newe bibî şinasî. Girkê Legê de niqtayê kontrolî yê Gîrzûrun destê Hukmatê Şamî de bi û şarî rê zulim ameyêne kerdene. YPG newe ronîyabi. Bi waştişê şarî hetê YPGyî ra seba azadîya ucayî hemleyêk dest pêkerd. Zimistan bi. Bakur û Rojhelatê Sûrîyeyî zaf vewre nêweno la a serre xeylê vewre varaybî. Hetê YPGyijan ra niqta gêrîya çember. Înan seba ke xo vewre ra bipawê naylonî eştibî xo ser. Ma rojnamegerî zî 2 rojî dûrî ra temaşe kerd. Roja hîrêyine heval Seyîd ame. Mi warê operasyonî dûrî ra mojna ey. Mi ra va ‘Ti çey şîyî warê operasyonî? Ti ganî nuşteyanê xo hîs bikerê. Ti heta hîsanê şerwanan hîs mekerê, ti nêşkenê înan binusê. Ti heta hîs mekerê, ti nêşkenê binusê’. Naye ser o ma pîya bîyê nêzdî û ma pîya 6 saetî binê naylonî de nêzdîyê şerî de mendê. Dima mi ferqê a xebere û xeberanê bînan ferq kerd. Ewro zî wexto ke ez xebere nusena, ez bi hîsê ê wextî nusena. Key nameyê heval Seyîdî bivîyero, ez xo binê ê naylonî de hîs kena û uca yeno verê çimanê mi. Ma do heta peynîye rêça ey ra şorê. Bedelê c içi beno wa bibo, ma do çapemenîya azade bipawê.”