Efrîn de keynayêka Kurde: Aysha

RONÎ PENABER

Fîlmo ke behsê xoverdayîşê keynayêka Kurde keno, heta nika 40 festîvalan de ame ramojnayene û 7 xelatî girewtê.

Derhêner Cengîz Akaygun bi fîlmê xo yê peyênî Aysha bale anceno xo ser. Heta nika fîlm 40 festîvalan de ameyo ramojnayene û 7 xelatî girewtê. Tewr peynî Festîvalê Fîlmanê Kilman ê Hambûrgî de xelate girewte. Aysha, Xelatanê Oscarî yê 95î de kewta lîste. Derhêner Cengîz Akaygunî Yenî Ozgur Polîtîka ra Ronî Penaberî rê qisey kerd.

Ma fîlm de gamanê verênan ê Şorişê Rojavayî vînenê û xoverdayîşê kenayêka 13 serrîye vînenê. Ma eynî wext de qereqterê Kurdan Aysha de vînenê. Nameyê Aysha sey metaforî hetê derhênerî ra ameyo weçînayîş. Dernêner vano ‘nameyê aye yo raştêkîn mi de nimite yo’.

Eke ez Efrîn de doman bibîyêne

Derheqê viraştişê fîlmî de Akaygunî va, “Hîkayeya keynayêka Kurde ya xoverdayoxe ya. A vera zîhnîyetê qirkerdoxan xo ver dana. Bi sembole Aysha mi waşt ez rewşa pêro domananê Rojavayî ser o çîyêk awan bikerê. Mi va, gelo ez Efrîn de domanêk bîyêne, ez eşkayêne senî vera zîhnîyetê DAÎŞî xo ver bidî. Bin ê hîsan mi no fîlm viraşt.”

Seba metrajê dergî nêame antene

Akaygunî dîyar kerd ke, do fîlm sey metrajê dergi meyero antene û va, “Seba ke fîlm zaf ame ecibnayene, nîyetê mi çin o ke ez sey metrajê dergî biancê. Raşt o, tayê fîlmî bin o qeyde hesab benê la Aysha fîlmêko winasî nîyo.”

Ma do Aysha reyde pîya şorê

Akaygunî dîyar kerd ke, seba ke fîlm kewto lîsteya Oscarî zaf pê şa bîyo û va, “Ez zaf wazena bin ê fîlmî Oscar bigerê. Badê Oscarî ma 3yî rê bimanê û xelate bigerê, ma do Aysha reyde bikewê têdest û pîya şorê merasîmê xelate.”