Efrîn do timûtim cewabê xo bi xoverdayîşî bido

Endama PYDyî ya Kantonê Efrînî Hêvîn Reşîde dîyar kerd ke do vera hêrişan xoverdayîşê xo biramnê.

20ê Çeleyî yê 2018î de Tirkîya û paramîlîteranê ci hêrişê Efrînî kerd û Efrîn kewt destê înan. Vera Bakur û Rojhelatê Sûrîyeyî û Efrînî ewro zî hêrişî yenê kerdene. Endama PYDyî ya Kantonê Efrînî Hêvîn Reşîde derheqê rewşe de JINNEWSî ra Mîdye Mîqtedî rê erjnayîşî kerdê.

Endama PYDyî ya Kantonê Efrînî Hêvîn Reşade va, “Efrîn bi barbarane ame bombakerdiş. Hêzanê mîyanneteweyîyan vengê xo nêkerd. Efrîn bi îradeyê xo yê bihêze bi qehremanî xover da. Hetê dewleta Tirkan ra vera Efrînî xeylê çîyê wehşîyî ameyê ceribnayene. Ma timûtim vera wehşetê dewleta Tirkan xover da.”

‘Zeytunêrî bi kede ameyê ronayene’

Reşîde bale ante zeytunêran ser o û va, “Wexto ke Efrînî rê hêrişî bîyê, dewleta Tirkan verî çimeyanê ekonomîkî hedef girewt. Zeytunêrî ke bi keda dayîkan, babîyan û domananê ma ameybî ronayane ameyê birnayîş. Nika hema zî nê darî her roje yenê birnayene û veşnayene. Wazenê nasnameyê Kurdanê Efrînî mîyan ra wedarê.”

Vera ambargo û hêrişan xoverdayîş

Reşîde va, “Îşxalê Efrînî ser ra 6 serrî vîyartê. Zaferîyê Efrînijan hêrişan ver Efrîn ra vejîyayê û şîyê mintiqaya Şehba. Hema zî Efrîn de wehşetê dewleta Tirkan dewam keno. Efrîn de cinî û domanî raştê tecawizan yenê, yenê kiştiş û xozaya Efrînî yena talankerdiş. Efrînijê ke ameyê Şehba, reyna zî vera hêrişanê dewleta Tirkan û ambargoya hukmatê Şamî xoverdayîşê xo domnenê.”

‘Efrîn vîrê ma de, zerrîya ma de cuwîyeno’

Reşîde peynî de dîyar kerd ke Efrîn vîr û zerrîya înan de cuwîyeno û va, “Vera ambargoya girane ya hukmetê Şamî û vera hêrişanê dewleta Tirkan Efrînijî do xoverdayîşê xo bidomnê. Çi beno wa bibo, ma do estbîyayîşê xo bipawê û ma do xover bidê.”

YENÎ YAŞAM