Muslîm: Erdlerzî sey dîyarîyêke vînenê

• Hemserekê Partîya Yewîya Demokratîke(PYD) Salih Muslîmî derheqê rewşa peyêne ya herême de ANFyî rê qisey kerd û bale ante politikaya dewleta tirke.

Hemserekê PYDyî Salîh Muslîmî ard ziwan ke dewleta tirke erdlerz sey dîyarîyêke hesibna û wina vat: “Wextê erdlerzî de zî hêrişê vera Rojawanî kerd. Bitaybetî Şehba yo ke binê tesîrê erdlerzî de mend, bêmabên ci rê hêrişê topan ameyî kerdene.”

Muslîmî vat: “Waştişê dewleta tirke qedînayîşê kurdan o. Şertî senî benê wa bibê, hêrişê dewleta tirke dewam kenê. Erdlerzî zî sey dîyarîyêke vînenê. Wextê erdlerzî de zî hêrişê vera Rojawanî kerd. Bitaybetî Şehba yo ke binê tesîrê erdlerzî de mend, bêmabên ci rê hêrişê topan ameyî kerdene. Pê droneyanê çekdaran hêriş kerd. Til Rifet de erdlerz bişîdet ame hîskerdene. Şar bananê xo ra vejîya û hêrişî zî nêvîndetî. Ganî şaro kurd nê qewimîyayîşan hol bivîno û fam bikero. Kenê ke şarê ma herra ci ra vejê.”

Muslîmî wina dewam kerd: “Serfermandarê Amerîka Mark Milley ame herême ke tîya leşkerê ci estê, heqê ey yê zîyaretî est o. Rewşêka îstîsna nîya. No zîyaret zaf ame qiseykerdene. Rojdemê dewleta tirke de cayê xo girewt û sey hetkarîya QSDyî ame îdîakerdene. Na herra dewleta tirke nîya û heqê ci yê destkarîye çîn o. Derheqê zîyaretî de zanayîşo zelal destê ma de zî çîn o û hayîya ma pê çîn a ey  QSDyî reyde pêvînayîş kerdo ya nê. QSDyî eşkerayîyêke nêdaye. Verî zî zîyaretê winayênî bîyî.

Muslîmî rewşa DAÎŞî ser o zî tayê zanayîşî dayî û wina vat: “Seba ke zaf kesî DAÎŞî weye kenê, hema bi temamî nêqedîyayo. Tayê çeke danê ci, tayê lojîstîk û tayê zî pere danê ci. Xora herra ke ameya îşxalkerdene de zî hişmendîya DAÎŞî est a. Heta ewro hêzêko vera DAÎŞî bêmabên têkoşîn keno QSD yo. Eke ewro tîya tehlukeyê DAÎŞî est o, no semedê dewletanê bînan zî tehluke yo. DAÎŞ hem wazeno kurdan qir bikero û hem zî dişmenê şaranê bînan o. Amerîka nê têkoşînî semedê xo dana. Ganî têkoşîno hempar bêro domnayene. Xora selahîyetdarê Amerîka zî wina vanê.”

ANF/HESEKÊ