‘Erdogan bikewo şer do hesabêko pîl bido’

BÊRÎVAN ALTAN / MA / ENQERA

Wekîlê HDPyî Hişyar Ozsoyî va, “Eke Erdogan nê pozisyon û hemsencîye de bikewo şer, do hêsabêko pîl bido.”

Hekkarê Hemserekê Endama Komîsyonê Karanê Teberî yê HDPyî Hişyar Ozsoyî derheqê meseleyanê Iraqî, hêrîşanê Tirkîya yê vera Bakur û Rojhelatê Sûrîyeyî û xebatanê xo yê dîplomatîkan de qisey kerd.

Hişyar Ozsoyî va, “2015î ra dima hêrîşanê Tirkîya de Başûrî de 130 ra zêder sîvîlî ameyê qetilkerdiş. Seba ke ê Kurdî bî, hem Iraqî ra hem zî hukmatê Başûrî ra zaf muhîmîye nêdîyayêne na meseleye. Badê Zaxoyî vengê ereban berz bi. Iraqî va wa Tirkîya eskeranê xo ewrdê ma ra veja. La pratîk de çîyêk nêbedilîya. Eskerê Tirkîya û qerargehê înan hema zî uca de yê û hêrîşî dewam kenê.”

‘Tek derdê Erdoganî îqtîdar o’

Ozsoyî va, “Mabênê Fînlandîya, Swêd û Tirkîya de memorandûmêk ame îmzakerdiş. Seba ke nê dewletî bikewê NATOyî mîyan, ganî pêro endamê NATOyî vajê heya. Erdogan waşte na rewşe ra havile bigero. Muqabeleyo ke mabênê Tirkîya, Swêd û Fînlandîya de bîyo, teslîmkerdişê çend kesan nîyo. Erdogan NATOyî de mîyanê bazarêkî pîlî de yo. Wazeno Sûrîyeyî de bikewo şer, çimkî bawer keno ke do bi şerî pay ra bimano. Erdogan wazeno bi paştîdayîşê rojawan û NATOyî îqtîdar de bimano. Tirkîya wazena Swêd û Fînlandîya seba ke bikewê NATO tawîzan bidê aye.”

‘Do hesabêko pîl bido’

Hişyar Ozsoyî peynî de va, “NATO û Rojawan Tirkîya silaynenê rolêkî sîyasî, eskerî û jeopolîtîkî. Erdogan û Baxçelî dişmenîya Kurdan kenê. Seba ke sîyasetê înan bêro ca, ganî hêza Kurdanê di cayan zeîf bikerê. Eke Tirkîya hêrîşa Rojavayî bikera, no şer do asan nêbo. Hem Kurdî xo hedre kenê hem zî hetê xeylê hêzan ra statukoya Sûrîyeyî yeno pawitene. Ê zî do bikewê mîyanê şerî. Eke Erdogan wexto ke winasî de bikewo şer, do hêsabêko sîyasî û eskerî yo pîl bido.”