Festîvalê Munzirî ame betalkerdiş

• Walîtîya Dêrsimî Festîvalê Munzirî betal kerd.

Hetê Walîtîya Dêrsimî ra xeylê çalakîyê festîvalî ameybî qedexekerdiş. Nê qedexeyan ver, hetê Komîteya Festîvalî ra bernameyê festîvalî yê Mamekîyeye ameyê betalkerdiş.

Festîvalê Munzurî do emser reya 20ine biameyêne pîrozkerdiş. Hetê walîtîye ra xeylê çalakîyê festîvalî û konseri ameyê qedexekerdiş. Nê qedexeyan ver, hetê Komîteya Tertîpkerdişî ya Festîvalî ra bernameyê festîvalî yê Mamakîyeye ameyê betalkerdiş. Vera qedexeyanê walîtîye şar ame pêser û bi rayîrşîyayîşêk qedexeyî protesto bîyê.

Wekîlê HDPyî Ayşe Acar Başaran, Alîcan Onlu û Pêro Dundar zî mîyanê şarî de bî. Şarê Dêrsimî qîra û va, ‘Festîval yê şarî yo, kes nêşkeno qedexe bikero’, ‘Dêrsim rûmet o, wayîrê rûmetê xo bivejîyê’.

Şar Meydanê Seyîd Rizayî de ame pêser. Tîya de hetê Serekê Beledîyeya Dersimî, Wekîla HDPyî Ayşe Acar Başaran, Serekê Federasyonê Komeleyanê Dêrsimî û Serekê  Federasyonê Komeleyanê Elewîyan ra qiseykerdişî ameyê kerdiş û qedexeyî hetê şarî ra protesto bîyê.

PÎRHA / DÊRSIM