Dêrsim de seydmanîye protesto bîye

Dêrsim de hetê Platformê Ked û Demokrasîyî yê Dêrsimî ra seydmanîye protesto bîye.

Platformê Ked û demokrasîyî yê Dêrsimî, qetlîamê heywanan bi malûmato çapemenîye protesto kerd. Malûmat vernîya walîtîye de ame dayene. Malûmat hetê endamê Partîya Keske ya Çepe Nurşat Yeşîle ra ame wendene.

‘Ma do destûr medê qetlîamî’

Nurşat Yeşîle dîyar kerd ke, vera cuya koyîye qetlîamî dewam kenê û va, “Hetê Wezaretîya Renc û Daristanî ra îhaleyî yenê viraştene, teber ra seydmanî yenî û înan rê zemîno qanûnî yeno pêardene. Şarê ma nêşkeno şêro dewanê xo de ca bibo la înan rê îmkanî yenê dayene. Ma nînan qebul nêkenê.”

Yeşîle dîyar kerd ke, Dêrsim hetê tewiranê endemîkan ra û tewirîya bîyolojîkî ra cayêko dewlemend o û va, “Goreyê Muqaveleyê Bernî gakovîyo qiloçin, peskovî, heş, zerenc, xozê koyî û werşaxî binê talukeyê çinbîyayîşî de yê û ganî bigêrîyê binê pawitişî. La her serre seba nê tewiran îhaleyî virazîyenî û nê tewirî yenê qirkerdiş. Ma nê qetlîaman qebul nêkenê.”

‘Wa heqê cuye yê gandeyan bêro pawitene’

Yeşîle va, “Qetilkerdişê gandeyan, vera bawerîya şarê ma û pîrozanê ci hêrîşkerdiş o. Gandeyî koyîyî, bawerîya şarî de pêroyîya xoza û cuye îfade kenê. Bi seydmanîye gandeyî yenê qetilkerdiş û vera xoza û bawerîye hêrîşî yenê kerdene. Ma ganî pêro pîya heqê cuye yê gandeyan bipawê û bin o qeyde têbigêrê.”

MA / DÊRSIM