Gazîya dîalogî: Çareserîye Abdullah Ocalanî de ya

Rêxistinê DEM Partî yê Enqera seba çareserîya meseleya Kurdan gazîya dîalogî kerde û ame dîyarkerdiş ke çareserîye de rolo tewr muhîm Abdullah Ocalanî de yo.

Rêxistinê Partîya Têduştî û Demokrasîya Şaran (DEM Partî) ê Enqera derheqê tecrîd û grevê vêşanîye yê girewteyan de kombîyayîşo çapemenî kerd. Îdarekar û endamê partî, ÎHD û endamê OHDyî bîyê beşdarê kombîyayîşî. 

‘Girewteyan ser de polîtîkayê tecrîdê giranî yenê ramitene’

Hemserekê DEM Partî yê Enqara Fatîn Kanatî va dîyar kerd ke heqê bingeyî yê girewteyan yenê binpaykerdene û va, “Pêvînayîşî, kitab û mektubî yenê astengkerdene, teda û işkenceyi benê, girewteyî heqê sihetî ra mehrûm manenê. Girewteyanê ke cezaya înan qedîyaya û girewteyê nêweşî keyfîyetî ser o nînê tehlîyekerdene. Hepisxaneyê girawe yê Îmrali de û pêro girewteyanê sîyasîyan ser de polîtîkayê tecrîdê giranî yenê ramitene.”

‘Seba çareserîye rolo tewr muhîm Birêz Ocalanî de yo’

Kanatî dîyar kerd ke 104 hepisxaneyan de xoverdayîşo pîl yeno dayene û va, “Grevê vêşanîye de yeno waştene ke tecrîd bêro wedartene û azadîya fizîkî ya Abdullah Ocalanî bêra peydakerdene. Abdullah Ocalan û girewteyî Omer Hayrî Konar, Hamîlî Yildirim û Veysî Aktaş 1000 rojî ra zêder o ke nêşkenê keye û awiqatanê xo de pêvînayîş bikerê.”

‘Seba çareserîye têbigêrê’

Kanatî va, “Ma nêwazenê wa adir bikewo keyeyan. Seba ke grevê vêşanîye ra xeberê mergî meyerê, ma îqtîdarî rê, sîyasîyan rê gazîye kenê ke wa goş bidîyo waştişanê girewteyan û seba çareserîya meseleya Kurdan de berê dîalogî bêrê akerdene wa têbigêrê.”
Hemserekê Şûbeya ÎHDyî yê Enqera Omer Faruk Yazmaciyî zî dîyar kerd ke Îmrali de bêhiqûqîye ameya awankerdene û va, “Tecrîd tena hiqûqî ney sîyasî û komelkî yo zî. Vera tecrîdî vejîyayîş hiqûqî yo. Îhtîyacîya Birêz Ocalanî bi pawitoxîya ma çin a la seba ameyoxê azadî û seba ke domanê ma bieşkê mîyanê haştîye de bicuwîyê ma ganî bale biancê rewşa Ocalanî  ser o.”

MA / ENQERA