Gimgim Tîyatro Zonêmayî ra gaziye: Ma ganî seba Kirmanckî têbigêrê

Koma Tîyatroyî ya Gimgim Tîyatro Zonêmayî seba ziwanî gazîyêk kerde. Înan va, “Seba ke ziwanê ma yê dayîke vîndî mebo ma kede danê la kayanê xo de ma raştê astengîyan yenê.”

Goreyê raporê UNESCOyî yê 2018î 6 hezar ziwananê dinya ra 2 hezar 500 hebî binê talukeyî de yê. Kirmanckî ziwanê 4 mîlyon û 600 hezar kesan a û goreyê raporanê UNESCOyî Kirmanckî zî binê talukeyî de ya û ver bi vîndîbîyayîşî şina. 

Koma tîyatroyî ya Gimgim Tîyatro Zonêma 2016 de Izmîr de awene bîye. Kome, kay û skecanê xo safî bi Kirmanckî kay kena û seba Kirmanckî kede dana.

Endamanê kome ra Dunya Şanikane û Mehmet Yoranî derheqê xebat û astengîyanê karê xo de qisey kerdo. 

“Seba ziwanê ma çi ma dest ra yeno ma kenê” 

Endama kome Dunya Şanikane va, “Ma seba ke ziwanê xo yê dayîke de karê tîyatroyî kenê, ma raştê astengîyan yenê. Vera vîndîbîyayîşê ziwanî çi ma dest ra yeno ma kenê. Polîtîkayanê dewlete ver ziwanê ma kewto bînê talukeyî la kes nêşkeno keyeyanê ma de ma rê asteng bo. Ma ganî domananê xo de bi Kirmanckî qisey bikerê û ganî domanî bi bawerî û kulturê ma bicuwîyê.”

“Seba ke ziwanê ma vîndî mebo ma ganî xo ver bidê”

Endamê kome Mehmet Yoranî va, “Ma 2016î ra nat kayanê xo bi ziwanê dayîka xo kay kenê. Kirmanckî binê talukeyî de ya. Ma wazenê wa şarê ma wayîrê ziwanê xo bivejîyo. Seba ke ziwanê ma vîndî mebo ma ganî xo ver bidê. Keyeyî ganî domananê xo de ziwanê xo qisey bikerê ke ziwan bicuwîyo.”

PÎRHA / MÛŞ