Godernê xatir wazeno

• Gelîya Godernê û Pirdo Tarîxî do binê awbendê Sîlvanî de bimanê.

Gelîya Godernê û Pirdo Tarîxî do binê awbendê Sîlvanî de bimanê.

Polîtîkayê şerî benê sebebê afatanê pîlan. Nê polîtîkayan ra tewr zêde xoza tesîr gena. Bi mehneyê ewlehîye awbendî yenê viraştene, nê awbendî hem xozaye çin kenê hem vîrê merdiman çin kenê. Nê awbendan ra yew zî awbendê Sîlvanî yo. Goreyê malûmatan, awbend do qasê girdîya xo ceyran peyda mekero. Verî cû Heskîf û xeylê cayê qedîmî bine awbendan de mendibî. Nika zî Gelîya Godernê û Pirdo Tarîxî do binê awbendê Sîlvanî de bimanê.

Godernê do binê awe de bimano

Godernê, mabênê Sîlvan, Pasûr, Hezro û Licêyî de yo. Na gelîya rindeke, keyeyê xeylê nebatanê endemîkan û heywanan a. Awbendê Sîlvanî ver bi qedîyayîşî de yo. gelîya Godernê ya bêemsale do mîyanê 2 aşman de binê awe de bimana.

Mintiqa do bêra vengkerdiş

Nika ra înan dest pêkerdo û nêverdenê kes şoro gelîye. Muxtarê dewa Cumatî vato qereqolî vato ganî destûr bêro girewtiş. Muxtarî vato, “Nika qedexeyêk çin o la wexto ke pirdê serê gelîye bêro viraştiş, gelîye yena padayene.”

Semender: Neslê înan qir beno

Gelîya Godernê de xeylê heywanî cuwîyenê. Înan ra yew zî Semender o. No tewir hinî xeylê kêmî mendo. Ekserî kişta awe de cuwîyenê. Ê eşkenê mîyanê çend hefteyan de weslanê xo newe bikerê. Awbend do cuya Semenderan, Luyan, Xozan û kesayan çin bikero. Halînê xeylê teyr û mîrçikan do bibê xirabe. 

Çirrêko bêemsal

Gelîye de çirrêko bêemsal esto. No çirr zaf berz ra rişîyeno gelîye. Mêmanî ekserî verê nê çirî de boya xo danê. Xeylê şikeftî, dêrê zinaran, mezelê zinaran û rayîrê awe do binê awe de bimanê. Gelîya Godernê de pirdêko tarîxî esto. No pird wextê Merwanîyan de virazîyayo. No pirdo tarîxî zî do binê awa awbendî de bimano. Heta nika 10 dewî binê awe de mendê û hema 50na dewî do binê awe de bimanê.  Şarê nê dewan do mecbûrî koç bikerê. Awbendî tena dewan, gelîyan, daristanan çin nêkenê, hafıza û vîrê şarî zî talan kenê.

* Xebera Selman Çîçek, Yeni Yaşamî de vejiya