Rîsorî de qetlîamê daran: Darê seserreyî yenê birnayîş
duşem 8 tebaxê 2022 - 10:56
Mintiqaya Şirnexî ya Rîsorî de 2 serran ra nat darî yenê birnayene. Seba qirkerdişê daran rayîrê neweyî yenê viraştiş.
Cûdî, Gabar û Besta de 2 serran ra nat darî yenê qirkerdiş. Dewe û mintiqayanê Bestayî yê Cinîwer, Xerbîge Bestin, Navyan, Bêlûzer, Şerevan, Kaniya Mîr, Birateto, Birapeşo, Deyndarok, Serê rû, Tîkera, Qûrteka pêşya, Girê Derîncêyî de qetlîamê daran dewam keno.
Rîsorî de qirkerdişê daran
Rîsor mîntiqaya Bestayî yo û cayêko hîra yo. Daristanê Rîsorî bi birnayîşê daran yenê qirkerdiş. 2 serran ra nat bi deste qorîcîyan daristanê mazêrî raştê talanî yenê. Dewlemendîya xozaya Rîsorî birnayîşê daran ver zirar dîye. Her 400 metreyan de quleyê eskerî ameyê viraştiş.
Darê seserreyî do bêrê birnayîş
Goreyê malûmatanê şarê mintiqaye, her ca de darî yenê birnayene û seba ke daran bibirnê rayîranê neweyan virazenê. Bi viraştişê nê rayîran darê seserreyî do bêrê birnayîş. Goreyê malûmatan, eke birnayîşê daran nîya dewam bikero do heya peynîyê serre mintiqa biba req û rute.
MA/ ŞIRNEX