Hemserekîya DBPyî rê Uçare û Bayindir ameyê weçînayene

DBPyî kongreya xo ya 6ine viraşte û hemserekîya partî rê Çîgdem Kiliçgun Uçare û Keskîn Bayindir ameyê weçînayene.

Partîya Mintiqayanê Demokratîkan (DBP), kongreya xo ya 6ine Enqera de viraşte. Xeylê temsîlkarê sazîyan û welatîyî bîyê beşdarê kongre.

‘Gazîya ‘Abdullah Ocalanî rê azadîye’

Parlamenterê HEDEPî Gulderen Varli û Vezîr Coşkun hemserekîya dîwanî rê ameyê weçînayene. Payravindertişê hurmetî ra dima Coskunî selamî erşawitê girewteyanê sîyasîyan û dîyar kerd ke wa kongre biba wesîleya azadîya Abdullah Ocalanî û va, “wa rayîrê pêro embazanê ma akerde bo.”

‘Ma do seba yewîtîya neteweyîye xo ver bidê’

Hemserekê Pêroyî yê DBPyî Keskîn Bayindirî partî netîceya xoverdayîşê 30 serran a û va, “No rayîr de bi seyan embazanê ma cuya xo vîndî kerde. Ma ewro bi xoverdayîşî înan raye genê. DBP do bin a hêze xebatanê xo biramno. Birêz Ocalanî ser de tecrîdêko giran yeno ramitene. Ma qerardarê ke tecrîdî bişiknê. Ma do tecrîdî bişiknê û ma do azadîya fizîkî ya Birêz Ocalanî awan bikerê. Ewro dewletê kapîtalîstî wazenê Kurdan çin bikerê. Coka, ma do seba yewîtîya neteweyîye xo ver bidê. Ma do berpirsîyarîya xo biyarê ca.”

Gazîya ‘Rayîrşîyayîşê Azadîye’

Çîğdem Kiliçgun Uçare zî kongre de qisey kerd û va, “Ganî xoverdayîş hetê şarê Kurdistanî ra hîna bêro pîlkerdene. Ma nêşkenê tecrîdî tena sey bêhiqûqîye bivînê, na polîtîkaya dewlete ya. Wazenê çareserîye demokratîke ya meseleya Kurdan bigerê binê tecrîdî. Ma pêro waştoxanê têduştîye silaynenê Rayîrşîyayîşê Azadîye yo ke do 18ê Teşrîna Peyêne de bêro kerdene. Şikitişê tecrîdî yeno vateyê çareserîya meseleya Kurdan a se serrîye.”

Qiseykerdişan ra dima raporê malîyî û faalîyeten ameyê wendene. Dima weçînayîş ame kerdene. Hemserekîya partî rê Çîgdem Kiliçgun Uçare û Keskîn Bayindir ameyê weçînayene.

MA / ENQERA