Heyecanê Festîvalê Govende yê 33yinî

• Festîvalê Govende de emser Îswîçre, Fransa, Hollanda û Almanya ra 15 Grûbî beşdarê festîvalî benê û mîyanê grûban de 3 grûbê domanan zî estê.

Festîvalê Govende de govendê Kurdan yenê kaykerdene. Emser Îswîçre, Fransa, Hollanda û Almanya ra 15 Grûbî beşdarê festîvalî benê û mîyanê grûban de 3 grûbê domanan zî estê.

Festîvalê Govende hetê Govend Europayî ra yeno organîzekerdiş. Komîteyê Tertîpkerdişî vato, “Ma goreyê raştîya kulturê Kurdan festîvalan virazenê. Bi nê festîvalan, bi hezaran ciwanan xo rasnayo kulturê xo. Kapîtalîzm erjanê şaran bêqîmet keno û ma zî wazenê bera na rewşe xo ver bidê. Ma serranê peyênan de giranî danê xebatanê winasîyan.”

4ê Hezîrane de Duisburg de

Komîteyê Tertîpkerdişî vano, “Warê govende wextê pandemî de xeylê tesîr girewt. Ma wazenê bi festîvalê emserî, na venganîye orte ra wedarê. Festîvalê Govende yê emserî de çar welatan ra 15 grûbî ca genê. Emser do 3 grûbê domanan zî bivejîyê sehneyî ser. Ma do 4ê Hezîrane de Duisburgî de bi rayîrşîyayîşî festîvalê xo bidê dest pêkerdiş. 5ê Hezîrane de do qiseykerdişê akerdişî bibê û dima deyîrî bêrê vatene. Bernameyê muzîkî de Serhado, Tîtalê Feyzo, Rêber Serhat, Koma Xezex û Koma Medî ca genê. M abi festîvalê xo cewab danê polîtîkayanê asîmîlasyonî. Ma do çirey huner û kulturê x ora fek rameverdê. Ma pêro şarê xo û embazanê xo silaynenê festîvalê xo.”

BERLÎN