Îdareyê Xoserî bîlançoya hêrişanê Tirkîya eşkera kerd

Goreyê bîlançoya Îdareyê Xoserî, hêrişanê vîzêrî de 8 welatîyî ameyê qetilkerdiş û 18 welatîyî zî birîndar bîyê.

Îdareyê Xoserî yê Bakur û Rojhelatê Sûrîyeyî, bîlançoya hêrişanê Tirkîya yê vîzêrî eşkera kerd. Goreyê malumatanê Îdareyê Xoserî, hêrişanê vîzêrî de 8 welatîyî ameyê qetilkerdiş û 18 welatîyî zî birîndar bîyê. Ame dîyarkerdiş ke ceyranê 2 hezar û 200 dewan birîyayo. Vîzêrî bi teyare û SÎHAyan 40 hêrişî ameyê kerdene.

Cayê ke raştê hêrişan ameyê

Derheqê hêrişan de nê çîyê ameyê parekerdene: “Mehleya Cirnikî ya Qamişloyî de istasyonê Sadkobî, depoyê zadî, mehlaya Eleya de fabrîqa, 3 şîrketê înşîatî, matbaaya Sîmavî, Nêweşxaneyê Koronayî, îstasyonê ceyranî, depoyê êmî, nêweşxaneyê dîyalîzî, depoyê seramîkî, îstasyonê benzînî, depoyê Çîmontoyî, dewa Um Fursanî, fabrîqaya Berhemanê Pakîye yê Berfînî, Îstasyonê Sotemenî yê Botanî, qezaya Amûde de eywanê veyveyî, Kobanî de nêweşxaneyê Miştenurî, dewa Termîkî de fabrikaya kergan û çewlîgêk raştê hêrişan ameyê.

2 hezar û 200 ra zêderî dewî bêceyran mende

Ame dîyarkerdiş ke hêrişan ver 2 hezar û 200 ra zêderî dew û nahîyeyî bêceyran mende û eşkerayîye de ame vatene ke, “Teyareyanê dewleta Tirkan a îşxalkere Qamişlo, Dêrik û Dirbesîyê de îstasyonê radyoyan bomba kerdê. Hetê çeteyanê dewleta Tirkan ra dewa Dendenîyê ya Minbicî rê bi çekanê giranan hêrişî ameyê kerdene. Nê hêrişan de 2yê înan cinîyî 8 welatîyî şehîd bîyê. 18 welatîyî zî birîndar bîyê. Mabênê înan de doman û cinîyî zî est ê.”

Kesê ke ameyê qetilkerdene

Eşkerayîye de nameyê kesê ke ameyê qetilkerdiş eşkera bîyê: “Bêrîvan Mehemed, Ferhan Xelef, Riyad Hemo, Ferhan Temê, Rênas Hisên, Hisên Ehmed, Faris El Faris, Aye El Sebawî.” Tedawîyê 18 birîndaran zî nêweşxaneyan de dewam kenê.

23yê Kanûne ra nata Tirkîya hêrişê xo zêdînayê. Nê hêrişan de awanîyê stratejîkî, warê sivîlî û merkezê sihetî bi teyareyan, SÎHAyan û bi çekanê giranan yenê bombakerdene.

MERKEZÊ XEBERAN