Îdareyê Xoserî ra komelê mîyanneteweyî rê gazîye: Hêrişanê Tirkîya rê bêveng mebê

Hetê Îdareyê Xoserî yê Bakur û Rojhelatê Sûrîyeyî ra serrgêra hêrişanê serêkanîyê û Girê Spî de eşkerayîye ameye dayene.

Hêrişê Tirkîya yê ke 4ê Teşrîna Verêne ra nat yenê kerdene dewam kenê. Îdareyê Xoserî yê Bakyr û Rojhelatê Sûrîyeyî serrgêra 4ine ya hêrişanê Serêkanîyê û Girê Spî de eşkerayîya nuştekî daye.

Verê çimanê dinya de qewimîyenê

Eşkerayîye de ame dîyarkerdene ke hêrişî verê çimanê dinya de bîyê û ame vatiş ke, “Pêkerdişê Emerîka û Erdoganî û bêvengîya mîyanneteweyî ver Serêkanîyê û Girê Spî ameyê îşxalkerdiş. Efrîn zî bi eynî qeyde ame îşxalkerdiş. No îşxal, koçkerdişî, dejî nê pêkerdişan û polîtîkayan ver qewimîyayê.”

Atmosfero sîyasî beno bingeyê hêrişan

Îdareyê Xoserî bêvengîya mîyanneteweyî rexne kerd û va, “Tirkîya eynî polîtîka xo, hêrişkarîya xo û qirkerdişî vera mintiqayanê ma ramnena. Hêza xo zî bêvengîya mîyanneteweyî ra gêna. Atmosfero sîyasî beno bingeyê hêrişan.”

Do pêro çimeyî bêrê seferberkerdene

Dewamê eşkerayîye de ame waştene ke ganî Tirkîya û grûbê ke girêdayîyê ci yê bêrê mehkemakerdene. Reyna ame dîyarkerdiş ke seba azadkerdişê cayanê îşxalbîyayîyan do pêro çimeyî bêrê seferberkerdene.

Pêro hêzan rê gazîye

Peynîya eşkerayîye de pêro hêzanê Sûrîyeyî, NY, sazîyanê heqanê merdiman, Konseyê Ewlehîye yê NYyî rê gazîye ameye kerdene ke wa rewşa cayanê îşxalbîyayîyan û hêrişan rê çimanê xo megerê û bêveng mebê.

MERKEZÊ XEBERAN