Îdîanameyê rojnamegeran 9 aşmî ra dima ame hedrekerdiş

Serdozgerîya Komare ya Dîyarbekirî, îdîanameyê rojnamegeran temam kerd û erşawit mehkema.

16ê Hezîrane 2022 de Amed de 22 kesî gerîyayê binê çimî. Înan ra 20 kesî rojnameger bî û pêro pîya 4 kesî ameyê veradayîş û ê bînî ameyê girewtene. Serdozgerîya Komere ya Dîyarbekirî, 9 aşmî ra dima îdîanameyî temam kerd. Hetê dozgerîye ra, derheqê 22 kesan de bi îdayê ‘endamê rêxistinîye’ îdîaname ame hedrekerdiş.

Îdîaname erşawîya Mehkemaya Cezaya Girane ya 4ine ya Dîyarbekirî. Mehkema do îdîameyî ser o cigêrayîşêk bikera û mabênê 15 rojî de qerarê xo bida. Eke bêro qebulkerdene, do prosesê dewa dest pêbikero.

Rojnameyê girewteyî

Hemserekê DFGyî Serdar Altan, Edîtorê MAyî Azîz Orûç, Mudirê Karanê Nuştişî yê Xwebûnî Mehmet Alî Aktaş, Mudira Karanê Nuştişê yê JINNEWSî Safîye Alagaş û rojnamegerî Zeynel Abîdîn Bulut, Omer Çelîk, Mazlûm Dogan Guler, Îbrahîm Koyûncû, Neşe Toprak, Elîf Ungur, Abdurrahman Oncu, Suat Dogukan, Remzîye Temel, Ramazan Gecîken, Lezgîn Akdenîz û Mehmet Şahîn 16ê Hezîrane 2022 de gêrîyayê binê çimî û ameyê girewtene.

YENÎ YAŞAM