Iraq: Wa Tirkîya eskeranê xo welatê ma ra bianca

Iraqî kombîyayîşê Konseya Ewlekarîye de waşt Tirkîya erdê ci ra bivejîya.

Iraqî kombîyayîşê Konseya Ewlekarîye de waşt Tirkîya erdê ci ra bivejîya.

Iraqî kombîyayîşê Konseya Ewlekarîye de waşt ke eskerê Tirkîya erdê ci ra bivejîyê. Wezîrê Karanê Teberî yê Iraqî Fûad Hisênî gazîya Konseya Ewlekarîye ya Neteweyanê Yewbîyayîyan kerde û va, “Seba pawitişê haştîye û ewlehîya mîyanneteweyî ganî çi keweno konseye ser bikera, ganî Konseya Ewlekarîye bi leze qerarêk bida ke Tirkîya mecbûr bimana eskeranê xo bianca.”

Fûad Hisênî nîya dewam kerd û va, “Tirkîya seba ke Iraqî de ca bida xo, xo rê mehneyan peyda kena la esasê xo de no problemê aye yo zereyî yo.”

Derheqê eskeranê Tirkan de Fûad Hisênî va, “Tirkîya Iraqî de 100 cayê eskerî awan kerdê û 4 hezarî ra zêder eskerê înan tîya de yê. Tirkîya vana ez seba PKKyî tîya de ya. No çîyêko hiqûqî nîyo. Tirkîya bê destûrê Iraqî ganî meeşka bikewa erdê Iraqî.

Bi waştişê Iraqî Konseya Ewlekarîye ya Netewîyanê Yewbîyayîyan de derheqê qetlîamê Zaxoyî de kombîyayîşêk amebi viraştiş. Hêrîşa Tirkîya amebi şermezarkerdiş. Tirkîya 20ê Temûze de seyrangehê dewêka Zaxoyî bomba kerdibî û qetlîamî de 9 sîvîlî ameybî qetilkerdiş, 23 kesî birîndar bibî.

MERKEZÊ XEBERAN