Kampanyaya paştîdayîşî: Yew Xebere Zî To Ra

çarşem 2 teşrînê 2022 - 16:49

  • Hetê DGF û MKGPyî ra seba ke paştî bidîyo rojnamegeranê girewteyan, kampanyaya paştîdayîşî ameye dest pêkerdiş.

Komeleya Rojnamegeran a Dîcle Firatî û Platformê Rojnamegeran ê Cinîyan ê Mezopotamyayî, seba ke paştî bidê muxabîranê MA û JINNEWSî kampanyaya paştîdayîşî da dest pêkerdene. Vernîyê awanîya DFGyî ya Ofîsî de malûmatêk ame dayene. Malûmat bi Kurdkî û Tirkî ame wendene. 

Qarneyê Cumhûrîyetî

Hemsereka DFGyî Dîcle Muftuoglû va, “Ha bigerê şima rê qarneyê Cumhûrîyetî. Tena 5 aşmanê peyênan de 26 rojnamegerê Kurdî ameyê girewtene. Rojnamegerî raştê îşkenceyan ameyê. Destê înan ameyê kelemçekerdiş, sereyê înan ameyê çewtkerdiş ke, mesaj bidîyo rojnamegeran. Ma kare xo kenê û rêçe heqîqetî ra şonê. Ma mesajê şima girewt û ma vanê ganî şima ma ra bitersê. Şima do rojêk hesabê nê eybî bidê.”

‘Ma mende yê, şima şîyayî yê’

Muftuoglû va, “Awanîyê rojnameyan ameyê bombakerdiş, rojnamegerî ameyê qetilkerdiş û erzîyayê hepsan la çapemenîya Kurdan çirey game têpîya nêeşte. Eqsê ci şîyê ver bi rastîye û dek û dolabî ameyê eşkerakerdiş. Şima vanê ma vîzêr kiştêne û ewro zî erzenê hepsan. Şima do binê na bêhiqûqîye de bimanê. Peynîya şima zî do biba sey îqtîdaranê bînan. Ma do timûtim tîya de bê. Şima zî şîyaye yê. Şima hinî nêşkenê vajê nê rojnameger nîyê. Kesê ke wesfê şima danê rojnameger ê? Şima nêşkenê bin ê kerdenanê xo rojaneyî bibedilnê. Şerê şima zî do emrê şima derg mekero.”

‘Qiseyî qedîyayê, wextê çalakîyan o’

Dîcle Muftuoglû peynî de gazîyêk kerde û va, “Ma cerebeyanê xo ra zanê ke, ewro ma meşte zî do şima bibê hedef. Ma ganî pêro pîya vera nê zulmî bigerê. Hêza ma esta. Ma ganî bibê yew û xo ver bidê. Coka ma vanê ke, qiseyî qedîyayê û nika wextê çalakîyan o. Ma wazenê kampanyayêk bide dest pêkerdiş. Ma eşkenê bi nuşteyanê xo paştî bidê embazanê xo yê rojnamegeran. Ma pêro hemkaranê xo silaynenê kampanyaya ‘Yew Xebere Zî To Ra’yî. Xeber û nuşteyê şima do hêze bide xoverdayîşî û qeyd û bendê çapemenîye do bişikîyê.”

MA / AMED
 

parvê bike

   

Yeni Özgür Politika

© Copyright 2024 Yeni Özgür Politika | Mafên belavkirinê parastî ne.