Karaca: Kişanake raştê îşkenceyî ameye

Parlamentera EMEPî Sevda Karaca dîyar kerd ke Gultan Kişanake cinaza ra dima cayêkî sey depoyî de ameya girewtene û raştê muameleyê îşkenceyî ameya.

Parlamentera EMEPî ya Dîlokî Sevda Karaca dîyar kerd ke şîyayîş û ameyîşê cinaza de, Gultan Kişanake raştê muameleyanê îşkenceyî ameya.

Waya Gultan Kişanake Zeynep Kişanake cuya vîndî kerde û 9ê Tebaxe de Xarpêt de merasîmê cinaza virazîya. Gultan Kişanake zî ameyê cinazaya waya xo la dima raştê muameleyanê xiraban ameye.

Cayêkî sey depoyî de ameye girewtene

Karaca şîyê Hepisaneyê Kandira û zîyaretê xo de nê çîyan musaya. Karaca va, “Waya ci ke defin bena, cendirmeyî aye benî Hepisxaneyê Xarpêtî. Aye vato çira şima ez arda tîya û înan zî aye ra vato 4 saetî destur dîyayo û coka ma to arda tîya. Waşta tîya de embazanê xo het de bimana û înan a eşta cayêkî sey depoyî. Kişanake israr kerda û eşkaya bi telefon xebere bida keyeyê xo ke hema Xarpêt de ya.”

7 saetî ezîyet

Karaca va, “Dima Gultan Kişanake musena ke înan a berda Sêwas. Seba ke teyyara peyda nêbîya înan a berda Sêwas. No rayîr bîyo ezîyet û şewe saete 03.00 de hema rasaya Kandira. No muamele hem teberê merdimîye yo û hem bêhiqûq o.” 

Karaca gazîye kerde ke ganî derheqê mesele de cipersayîş bêro akerdene û berpirsîyarî vejîyê meydan.

MERKEZÊ XEBERAN